Үүнэр көлүөнэ тыйаатыра Аҕа дойдуну көмүскээччи күнүн көрсө анал байыаннай дьайыы кыттыылаахтарын туһунан «Алҕаа миигин, доҕорум...» испэктээги сүрэхтээтэ. Премьера олунньу 21 күнүгэр Марк Жирков аатынан Муусука колледжын дьоҕус кэнсиэртиир саалатыгар буолла.
Анал байыаннай дьайыы тыынын уратытык биэрэр, байыастар туруктарын толору арыйар дириҥ ис хоһоонноох, сүрэҕи долгутар, санааны уйадытар ураты көстүүлэрдээх туруоруу көрөөччү биһирэбилин ылыан ылла. Испэктээк кэннэ көрөөччүлэр, олор истэригэр оскуола оҕолоро уонна устудьуоннар, испэктээги олус чугастык ылыммыттарын, араас иэйиини барытын билэн ааспыттарын билиннилэр.
Тэрээһин үөрүүлээх чааһыгар култуура уонна духуобунай сайдыы миниистирин бастакы солбуйааччыта Мария Турантаева Үүнэр көлүөнэ тыйаатырын кэлэктиибигэр анал байыаннай дьайыы тиэмэтин хорсуннук ылсыбытын иһин махтанна уонна бу туруоруу устуоруйа биир суолталаах түгэнэ буоларын бэлиэтээтэ.
Ааптарга сүбэ-ама буолбут анал байыаннай дьайыы кыттыылааҕа, «Сулусчаан» дизайн-устуудьуйа салайааччыта Ростислав Павлов бу тиэмэ култуура уонна ускуустуба эйгэтигэр киирэн үйэтитиллэн эрэриттэн үөрэрин биллэрдэ. Манна даҕатан эттэххэ, испэктээккэ «Защитники Отечества» пуонда эрэгийиэннээҕи салаатын өҥөтүнэн, анал байыаннай дьайыы кыттыылаахтара, кэргэттэрэ уонна аймахтара сырыттылар.
Туруорууну, үгэс быһыытынан, тыйаатыр уус-уран салайааччыта, СӨ норуодунай артыыһа Алексей Павлов арыйда. Кини, Арассыыйаҕа Норуоттар сомоҕолоһууларын сыла биллэриллибитин тоһоҕолоон туран, анал байыаннай дьайыыга сылдьар байыастарбыт хорсун быһыыларын үйэтитэр, дойдуга бэриниилээх көлүөнэни иитэн таһаарар ытык иэспит буоларын эттэ.
Санатар буоллахха, испэктээккэ олук буолбут пьеса ааптарынан тыйаатыр литэрэтиирэ чааһыгар сэбиэдиссэйэ, РФ суруналыыстарын сойууһун чилиэнэ Күндэли Нарынай Удьуора буолар. Кини, испэктээккэ сөптөөх айымньыны булбакка, бэйэтэ суруйарга быһаарыммыта.
«Хара маҥнайгыттан байыастар сомоҕолоһууларын көрдөрөр санаалаах этим. Ол санаабын Давид Архан диэн замполиттыы, хамандыырдыы сылдьыбыт АБДь кыттыылааҕа уонна, байыастар дьиэ кэргэттэрин кэмитиэтин бэрэссэдээтэлэ, ыар сүтүктээх ийэ Светлана Диодорова-Лаврентьева чиҥэтэн биэрбиттэрэ. Онон, кинилэргэ махталым улахан», - диэн ааптар истиҥник махтанна.
Бэрт кылгас кэм иһигэр турбут испэктээккэ көрөөччүлэр артыыстар оонньууларын олус кэрэхсээн бардылар. Уолаттар чахчы да бэйэлэрин оонньуур курдук оонньоотулар, уобарастарын табатык арыйдылар, биир сомоҕо буоланнар, бары чаҕылхайдар уонна уратылар, туруоруу кэмигэр ааптарга уонна режиссерга элбэхтик көмөлөстүлэр, оруолларын сүрэхтэринэн-быардарынан аһартылар. Байыастары барыларын холбуур сүтүктээх ийэ уобараһын СӨ үтүөлээх артыыһа Анна Флегонтова итэҕэтиилээхтик толорон, көрөөччүнү улаханнык уйадытта, ытатта.
Ити курдук режиссер Александр Титигиров талааннаах туруоруутун, худуоһунньук Мария Иванова сатабыллаах үлэтин, уотунан уонна муусуканан ураты киэргэтии түмүгэр олус истиҥ уонна дириҥ суолталаах испэктээк үөскээн таҕыста. Тыйаатыр, бас билэр дьиэтэ-уота суох сылдьар кыһарҕаннаах да кэмигэр, уустук да усулуобуйаҕа, идэҕэ, дойдуга уонна норуокка бэриниилээҕин көрдөрдө.
Үүнэр көлүөнэ тыйаатырын пресс-киинэ
