Валентин Макаров киинэтэ биэс сэттиэлэ иһигэр 25 037 992 солкуобайы “өлөрдө”. Санатан эттэххэ, онтон 2 264 139 солкуобайа бастакы күҥҥэ киирбитэ.
Кэрэхсэбиллээҕэ диэн, дьон сылдьара аҕыйаан иһэн, бу өрөбүллэргэ көрдөрүү саҥаттан тубуста: ааспыт сүбэ күн 224 918 солкуобай, онтон өрөбүлгэ 368 412 солкуобай киирдэ. Хартыына киинэ тыйаатырдарыгар билигин да көстө турар.
Киинэ ис хоһооно кылгастык суруйдахха маннык.
Ньургун олоҕун тухары аҕатыгар син киһи тэҥэбин диэн өйдөтө сатыыр. Онто отой сатаммат. Эбиитин, пицца аҕалан биэрэр курдук судургу үлэтиттэн кытары уураталлар. Санаата-оноото урусхалланан эрдэҕинэ фитнес-блогер дьарыктаах атаһа Сарыал кэлэр. Уонна күүлэйгэ кыттарын устарыгар “миигинниин барыс” диэн ыҥырар.
Ньургун тыа сиригэр кэлэн билбитэ – бу буолуохтаах күүлэй сэлиэнньэ дьылҕатыгар улахан суолталаах эбит. Аны туран, Сарыал от охсоору бэлэмнэнэ сылдьан эчэйэр. Кини оннугар хайаан да ким эбит кыттыахтаах. Ньургунтан атын ким да суох буолан биэрэр...
Валентин Валентинович Макаров – режиссер, Саха академическай тыйаатыр уонна Олоҥхо тыйаатырын артыыһа. 1988 сыллаахха төрөөбүтэ. АГИИК бүтэрбитэ. Ордук биллибит киинэлэрэ –«Дьулуур: мас-рестлинг» уонна «Мин аатым Таптал».
