Бүгүн А.Е. Кулаковскай аатынан Норуоттар доҕордоһууларын дьиэтигэр “Өксөкүлээх сардаҥата” диэн патриотическэй аахсыйа ыытылынна. Бу тэрээһин саха литэрэтиирэтин төрүттээччи, үөрэхтээччи, бөлүһүөк Өксөкүлээх Өлөксөй төрөөбүтэ 149 сылыгар ананна. Аахысыйаны СӨ бастакы президенэ М.Е. Николаев бибилэтиэкэ-архыыба иилээн-саҕалаан ыытта.
Фойеҕа А.Е. Кулаковскай олоҕор, үлэтигэр анаммыт кинигэ быыстапката ыалдьыттар болҕомтолорун тарта. Тэрээһини виртуоз хомусчут Артур Семенова-Тоҥ Саха арыйда.
Аахсыйа сүрүн түгэнинэн аналлаах чүмэчини уматыы буолла. Бу чүмэчи Өксөкүлээх Өлөксөй “хараҥа” кэмҥэ үөрэхтээһин сырдык уотун саха омугар ууммутун, биир дойдулаахтарыгар эрэл кыымын сахпытын кэрэһилиир. Чүмэчини А.Е. Кулаковскай сиэнэ Татьяна Реасовна Кулаковская, Ил Түмэн бэрэссэдээтэлин солбуйааччы Афанасий Владимиров уонна тэрээһин ыытыллыбыт уораҕайын генеральнай дириэктэрэ Антонида Корякина уматтылар.
Салгыы СӨ Норуодунай артыыһа, РФ Үтүөлээх артыыһа Дмитрий Артемьев “Ойуун түүлэ” поэматтан быһа тардыыны аахта.
Ол кэнниттэн бары Доҕордоһуу болуоссатыгар баран А.Е. Кулаковскай мэҥэ бэлиэтигэр сибэкки дьөрбөлөрүн уурдулар.
Бу сиэри-туому толорууга СӨ култуураҕа уонна духуобунай сайдыыга миниистирэ Афанасий Ноев, СӨ Тас сибээс уонна норуоттар дьылалаларын миниистирин бастакы солбуйааччы Сергей Хатылыков, эрдэ ахтыллыбыт Антонида Корякина, Өксөкүлээх Өлөксөй сыдьааннара, Саха сирин интеллигенциятын, уопсастыбаннаһын бэрэстэбиитэллэрэ кытыннылар.
Быйыл Арассыыйаҕа норуоттар сомоҕолоһууларын сыла, онтон өрөспүүбүлүкэбитигэр Култуура сыла. Онон Өксөкүлээх Өлөксөй айымньыларын суолтата өссө улаатар, дириҥиир диэн бэлиэтээтилэр. Кини саха омугун дьылҕатын эрдэттэн өтө көрөн суруйбут санаалара, атын омуктары кытта доҕордуу сыһыаннаах олоруҥ диэн кэриэс эппит тыллара үүнэр көлүөнэҕэ куруутун холобур буола туруохтара.
Хаартыска: Айталина АРГУНОВА.
А.Е. Кулаковскай аатынан Норуоттар доҕордоһууларын дьиэтин пресс-сулууспата.
