Муус устар 8 күнүттэн Дьокуускай куоракка Ил Дархан Айсен Николаев бирииһигэр ыытыллар олоҥхоһуттар өрөспүүбүлүкэтээҕи куонкурустара саҕаланна. Күөн күрэскэ барыта 37 олоҥхоһут кыттар, оттон кыайыылаах 500 000 солкуобайынан наҕараадаланыа.
Өрөспүүбүлүкэтээҕи куонкурус үс түһүмэхтээх буолуоҕа. Түмүктүүр көрүү аны күһүн сэтинньигэ ыытыллара былааннанар. Тэрийээччилэр этэллэринэн, олоҥхоһуттар сүрүннээн Чурапчыттан, Сунтаартан, Ньурбаттан, Уус Алдантан уонна Мэҥэ Хаҥаластан кэлбиттэр.
“Быйыл Ил Дархан Олоҥхо үһүс уон сылын тэрийэр ыйааҕы таһаарбыта. Саха олоҥхотун ЮНЕСКО киһи аймах кылаан чыпчаал айымньытын билиммитэ номнуо 20 сыла буолла. Ил Дархан бирииһигэр олоҥхону толорууга бэрт интэриэһинэй куонкуруһу толкуйдаатыбыт. Уратыта диэн, кыттааччылар олоҥхону толору, бириэмэнэн хааччаҕа суох уонна кыаллар буоллаҕына, кэрчиктэрин быспакка толоруохтара. Куонкурус үс түһүмэхтээх буолуоҕа: бастакытыгар кырата биир чаас толоруохтара, иккискэ – түөрт чаас кэриҥэ, үһүскэ – аҕыс чаастаан итэҕэһэ суох. Барыта 37 киһи суруйтарда. Үһүс түһүмэх түмүгүнэн үс бастыҥ толорооччу быһаарыллыа. Бастакы миэстэни ылбыт 500 000 солкуобайынан наҕараадаланыа. Иккис – 200 тыһ. солк., үһүс – 100 тыһ. солк.”, – диэн СӨ бырабыыталыстыбатын бэрэссэдээтэлин солбуйааччыта Сергей Местников кэпсээтэ.
Кыттааччылартан саамай эдэрдэрэ Сайыына Шамаева. 21 саастаах эдэр олоҥхоһут Бүлүү улууһуттан төрүттээх. Эбэтин көҕүлээһининэн түөрт сааһыттан олоҥхолуур буолбут.
