Муус устар 15 күнүгэр Санкт-Петербург куоракка «Боотур тыйаатыра» диэн аан дойду таһымнаах саҥа барыл уонна Д.К. Сивцев – Суорун Омоллоон аатынан Саха Өрөспүүбүлүкэтин Опера уонна балет тыйаатырын туһунан документальнай киинэ сүрэхтэниитэ буолла.
Бу киинэҕэ Уһук Илин саамай былыргы, ону таһынан Аан дойду үрдүнэн соҕотох хотугу Опера уонна балет тыйаатырын иһинээҕи кистэлэҥ олоҕо аан бастаан көрдөрүлүннэ. Көрөөччүлэр «Ньургун Боотур», «Сияющий камень» уонна «Щелкунчик» курдук тыйаатыр сүрүн испэктээктэрин туруоруу хайдах барарын, артыыстар үлэлэрин киэҥник көрүөхтэрэ.
Саха сирэ Арассыыйа иһинээҕи бэрэстэбиитэлистибэтин уонна «Сайдыы» эдэр дьон тэрилтэтин көмөтүнэн, бу барыл Санкт-Петербург араас култуура кииннэригэр, түмэллэригэр уонна үрдүкү үөрэх кыһаларыгар көрдөрүллүөҕэ.
Пресс-кэмпириэнсийэ арыллыытыгар Саха сирин Арассыыйа иһинээҕи бэрэстэбиитэлин солбуйааччыта Евгений Петров Саха сирэ уонна Санкт-Петербург култуура эйгэтигэр ыкса ситимнээх үлэлэрин, ону тэҥэ Саха сиригэр — Култуура сыла, Санкт-Петербурга — Петербургскай култуура сылын чэрчитинэн буолар бырайыактар суолталарын бэлиэтээтэ.
«Сайдыы» тэрилтэ бэрэссэдээтэлэ Юлиана Пермякова кэлин тэриллиэхтээх көрдөрүүлэр туһунан кэпсээтэ. Киинэ хайдах оҥоһуллан тахсыбытын уонна Саха сирин култууратыгар кини суолтатын туһунан тыйаатыр дириэктэрэ Владислав Левочкин, бырайыак салайааччыта Мила Кудряшова, сүрүн балетмейстер Екатерина Тайшина уонна балет артыыһа Мария Кузьмина видеоситим нөҥүө кэпсэттилэр.
«Боотур тыйаатыра» барыл саха балетын сайдыытын уонна биһиги төрүт тыйаатырбыт үөскээбит кэмин кэлэр көлүөнэҕэ хаалларар улахан суолталаах хамсаныы буолуоҕа.
Бэй.кэр.
Хаартыска: sakha.gov.ru
