Биллэрин курдук, былырыын Дьокуускайга Национальнай ойуулуур-дьүһүннүүр урамньы түмэлигэр Даши Намдаков улахан быыстапката тэриллэн, биһигини үөрдүбүтэ. Аатырбыт худуоһунньук бэйэтэ кэлэн, көрсүһүүгэ сылдьан, төрөөбүт Укурик дэриэбинэтигэр Тужи диэн төрүт үгэстэри сөргүтэр ленд-паарка тэрийбитин кэпсээбитэ. Биһиги Үҥкүүбүт тыйаатырын кэлэктиибэ, ол Укурикка тиийэн, олохтоохторго уонна ыалдьыттарга кэнсиэр көрдөрдө.
Даши Намдаков анаан-минээн Москубаттан тыйаатыры, саха үҥкүүһүттэрин көрө кэлбит. Пааркаҕа, тыыннаах айылҕаҕа, буолбут саха төрүт муусуката доҕуһуоллаах кэнсиэри кэрэхсээн, худуоһунньук маннык эппит:
– Мин Саха сирин ускуустубатын араас хайысхаҕа син билэбин диэхпин сөп. Бу Тужига Үҥкүү тыйаатыра кэлэн бүтүн кэнсиэр көрдөрбүтэ биһиэхэ туох да улахан чиэс дии саныыбын. Тыйаатыр, чахчы, “фантастика” кэнсиэри көрдөрдө! Саха норуота эрэ маннык доҕордуу бырааһынньыгы бэлэхтиэн сөп. Махтал эһиэхэ! Саха норуота биһиги өбүгэлэрбит истиҥ сыһыаннарын, үтүө санааларын, сырдыкка итэҕэллэрин мэлдьи илдьэ сырыттын!
Нина ГЕРАСИМОВА.
