Бу күннэргэ Сахабыт сирин бастакы поэтессата Варвара Потапова төрөөбүтэ 80 сылын бэлиэтиир тэрээһиннэр ыытылыннылар.
Онуоха СӨ Судаарыстыбаннай Үүнэр көлүөнэ тыйаатыра, бу бэлиэ түгэҥҥэ сөп түбэһиннэрэн, Дьокуускай куорат Антонина уонна Николай Чиряевтар ааттарын сүгэр Национальнай гимназия үөрэнээччилэригэр Варвара Потапова хоһооннорунан туруоруллубут «Ойдом үүммүт хахыйах» моно-испэктээги көрдөрдө.
СӨ үтүөлээх артыыһа Валентина Якимец дьикти туруоруутугар сүрүн оруолу эдэр талааннаах артыыс Татьяна Хомподоева оонньоото. Кини Варвара Потапова хоһооннорун иэйиилээхтик, чаҕылхайдык ааҕан, поэтэсса уобараһын итэҕэтиилээхтик арыйда. Бу ырыа буолбут хоһооннор үөрүү-көтүү да, санаарҕабыл да уйулҕаны кыынньаран, эдэр да, эмэн да көрөөччү сүрэхтэрин долгуттулар. Поэтэсса айылҕаттан айдарыытын, чараас эйгэтин, уйан дууһатын, дойдутугар, төрөппүттэригэр уонна тапталыгар анаммыт хоһооннорун дириҥ ис хоһооно көрөөччүгэ толору тиийдэ.
Дириэктэр Валентина Пермякова көмөтүнэн 6-8 кылаас оҕолоро бу испэктээги көрдүлэр. Эдэр ыччат туруорууну болҕойон иһиттилэр, улуу поэтэсса олоҕун уонна айымньытын туһунан элбэх саҥаны биллилэр. Сүрэхтэринэн ылынан, көрбүттэрин сөбүлээбиттэрин бэлиэтигэр хайҕабыллаах ытыс тыаһын бэлэхтээтилэр. Валентина Семеновна оҕолору гимназияттан тахсыбыт талааннаах артыыс Сергей Эверстовы кытта билиһиннэрдэ. Көрүү кэнниттэн оҕолор испэктээккэ кыттыбыт артыыстары Илья Яковлевы, Спартак Ларионовы, Никита Соловьевы кытта хаартыскаҕа түстүлэр.
Бэй.кэр.
Хаартыска: Үүнэр көлүөнэ тыйаатырын пресс-киинэ.
