Эстрада ырыаһыта, режиссёр, “Этигэн Хомус”, “Саҥа Ырыа”, “Дохсун”, “Үрдэл” мусукаалынай куонкурустар, бириэмийэлэр лауреаттара, “Сахалыы Виктория” араадьыйа сүрүн эрэдээктэрэ, СӨ култууратын, тэлэбиидэнньэтин, араадьыйатын уонна Ыччат бэлиитикэтигэр туйгуна Пётр Кулаковскай – эрэдээксийэбит ыалдьыта.
Холобур оҥостор күндү киһим эһэм - Туутук
1990 сыл алтынньы 11 күнүгэр Мэҥэ Хаҥалас Павловскайыгар Кулаковскайдар дьиэ кэргэҥҥэ айыылартан айдарыллан, орто дойду олоҕор айыллан кэлбитим. Аҕам Баһылай Баһылайабыс – чааһынай урбаанньыт, ийэм Сардаана Петровна – бибилэтиэкэр, бииргэ төрөөбүт иккиэбит, аҕам аатын иҥэриммит быраатым Вася миигиттэн 4 сыл балыс. Бэйэм көрсүө, истигэн уонна үтүө санаалаах буола иитиллибитим.
Эһэтэ Петр Дмитриев -Туутуктуун уонна ийэлээх аҕатыныын
Ийэм аҕата Пётр Никифорович Дмитриев-Туутук, олоҥхо чинчийээччитэ, үйэтин-сааһын тухары Гуманитарнай-чинчийэр институкка үлэлээбитэ. Бэдьээлэ, Ноорой курдук биллэр аатырбыт олоҥхоһуттар олоҥхолорун бэйэлэригэр тиийэн, илиинэн суруйан, онтон кэнники кэмҥэ диктофон кэссиэтэтинэн үйэтиппит киһи. Ол олоҥхо билигин ЮНЕСКО эпоһа буолан аатыра сырыттаҕа... Эһэм бу дьон тыыннаахтарыгар истэн, суруйан, устан хаалларбыт айымньыларын билигин Олоҥхо тыйаатырыгар үгүстүк туруораллар. Ол курдук, Степанида Борисова, Роман Дорофеев, Гаврил Менкяров курдук режиссёрдар туруораллар. Онон эһэм бу хайысхаҕа улаханнык үлэлэспит, турууласпыт киһинэн буолар. 90-с сылларга саха тыла улаханнык уруйдаммат-айхалламмат кэмигэр “Дьулуруйар Ньургун Боотур” кинигэни кэллиэгэтинээн, дьүөгэтэ Сардаана Ойуунускайаны кытта ылсаннар, улахан халыҥ кинигэни таһааран тураллар.
Олох салҕанар...
Хомойуох иһин, эбээбит эрдэ күн сириттэн күрэнэн, эһэм эдэр сааһыгар 30-тан эрэ тахсыбыт эдэр киһи 3 оҕолоох огдообо хаалар. Хайыай, олох салҕанар буоллаҕа... Дьолугар, Дьокуускай куоракка тапталын А.Е. Ильинаны көрсөр. Оччолорго Анегина Егоровна номнуо үтүөлээх артыыс ааттаах-суоллаах эбит. Эһэм кинини таптыы көрөн, “фанат” буолан, хас кэнсиэрин аайы сибэкки дьөрбөлөөх көрсөн, болҕомтотун уурар. Ону Анегина Егоровна бэлиэтии көрөн “Киһи киһитэ эбит, олохпун кинилиин холбуохпун сөп эбит” диэн мындыр өйүнэн салайтаран, холбоһоллор. Дьиҥнээх эбэбит Мария Дмитриева -- саахыматчыт, дуобатчыт, бибилэтиэкэринэн үлэлээбит. Ону утумнаан, ийэм эмиэ бибилэтиэкэр идэлээх.
Аҕам өттүн ылан көрөр буоллахха, бииргэ төрөөбүт 7-лэр. Айылҕаҕа, булка-аска чугастар. Эһэм өттүнэн бары каадырабай булчуттар, айылҕа куттаахтар. Онон мин эмиэ айылҕа оҕотунабын диэтэхпинэ сыыспаппын. Кулаковскай араспаанньам аҕабынан эбэм араспаанньата, кини Таатта Чөркөөҕүттэн төрүттээх. Сорохтор миигин “псевдонима” диэн саныыллар эбит.
Ырыа нэлэмэн күөх хонуутугар миигин оҕолорун курдук көрөн-истэн сылдьар настаабынньыктарым Сахаайа, Александр Бурнашевтар буолаллар. Кинилэри хайаан даҕаны ахтан, махтанан аастахпына табыллар. Миэхэ айар үлэлэрин улахан уопутун бэрсэллэр, сүбэ-ама буолаллар. Убайым, аҕа табаарыһым Сашалыын сууккаҕа 24 чаас кэриэтэ сибээскэ сылдьабыт.
Үтүөкэн дьону көрсүбүппэр дьылҕабар махтанабын
Павловскай орто оскуолатын 2008 сыллаахха туйгуннук үөрэнэн бүтэрэн, СГУ биология-география факультетын “эколог-природопользователь” хаапыдыратыгар үөрэммитим. Онон бастакы идэм – “эколог-природопользователь”. Онно үөрэнэр сылларбар табаарыстарым, бииргэ үөрэнэр оҕолорум үгүстэрэ үлэлииллэрэ – ким атыыһыттыыр, ким “хозмаркекка” ыскылаакка үлэлииллэрэ. Төлөбүрдээх үөрэххэ киирбит буоламмын истипиэндийэм суох. Ол иһин төрөппүттэрбиттэн харчы ылбакка, хайдах эрэ бэйэм үлэлээн, хамнастаныахпын баҕарарым.
Ол сырыттахпына арай, “Саха-Виктория” араадьыйаҕа ыытааччыга кастинг биллэрдилэр. Иһиттим эрэ, истибэтим эрэ, биир үтүө күн элээрдэн тиийдим. Резюме толорон, улахан кастины ааһан, ыытааччынан үлэҕэ киирбитим. Ити 2009 сыллаахха этэ. Онтон ыла номнуо 17 сыл ааһа оҕуста. Күн бүгүҥҥэ диэри үлэлии сылдьабын. Ыытааччынан үлэҕэ киирэн баран, салайааччы дуоһунаһыгар тиийэ үүннүм-сайынным.
Салайааччым Анна Исакова миигин олох оҕотун курдук көрөрө-истэрэ. Тылга-өскө, ырыаҕа-тойукка чугаһаппыт күндү киһим, саха мааны Далбар Хотуна буолар. Киниэхэ махталым тугунан да кэмнэммэт. Мин кинини мэлдьи настаабынньыгым, кураатарым диэн ытыктаан ааттыыбын. Олоххо муударай көрүүлээх, толкуйдаах, киниттэн элбэххэ үөрэммитим. Айар олохпор маннык кэрэ киһини көрсүбүппэр дьылҕабар махтанабын.
Бастаан үлэлии киирэрбэр устуудьуйа иһигэр бары тыгыалыы сылдьар чаҕылхай сулустар этилэр: Анна Исакова, Георгий Николаев, режиссёр Евгений Охлопков. Аны “Этигэн Хомус” күрэх күөгэйэр күннэрэ. Бу күрэх билиэтэ, омуна суох, атыыга таҕыстаҕына, биир күн иһинэн бүтэрэ. Каассаҕа дьон “итии килиэпкэ” турар курдук халыҥ уочарат буолара. Ол кэмҥэ үлэҕэ киирэммин, иһиттэн кинилэр ыытар үлэлэрин-хамнастарын, түүннэри-күнүстэри үлэлииллэрин эппинэн-хааммынан билбитим. Онно сылдьан ымсыыран “Оо дьэ, мин хаһан “улаатаммын” бу сулустардыын тэҥҥэ сылдьар буолабыный? – диэн ыра санаа оҥосторум. Эдэр дьон буоламмыт, оччолорго бэйэбит да арыый ырааҕынан сылдьарбыт.
Онтон дьэ “улаатан”, оттомуран, 2013 сыллаахха ыллаан барабын. Евгений Охлопков “Бу уол чахчы талааннаах, айар эйгэҕэ интэриэһинэй көрүүлээх эбит. Бу уолу ылыахха” диэн, “Этигэн Хомуска” улахан сүүмэрдээһини ааһаммын, “Сыл бастыҥ саҕалааччыта” номинацияҕа киирэбин. Оччолорго саҥа ыллаан саҕалаабыт эдэр ырыаһыттар Кеша Лебедев-Амикан, Майя Сергина буолан киирэн хаалабыт. Онно мин “Сыл бастыҥ саҕалааччыта” номинацияҕа тиксэбин уонна “Көрөөччү биһирэбилэ” аакка тиксэбин. Оччолорго былыргылыы “антракт” кэмигэр бары ыллаан бүппүттэрин кэнниттэн биир биир корешогунан куолас хомуйаллара. Онно миэхэ 800-тэн тахса куолас киирбит этэ.
Аан бастаан ыллыы тахсарбар “Сейчас или никогда” диэн кытаанахтык сананан тахсаммын ыллаабытым. Ол кэнниттэн бэйэбэр “Ыллыахпын сөп, дьон-сэргэ ылынар эбит” диэн ис турукпар эрэл, итэҕэл күүһүрбүтэ. Сарсыныгар, омун муҥутаан, саҥа ырыалары оҥотторон саҕалаабытым. Хор, оннук киһини кынаттыыр кыайыы өрөгөйө, көрөөччү таптала, сэҥээриитэ. Онтон саҕаламмыта ырыа киэҥ, алыптаах ЭЙГЭтигэр хорсуннук-хоодуоттук, кимиилээхтик киириим...
...Салгыы “Саҥа ырыа” интерактивнай куонкурус, “Дохсун” музыкальнай бириэмийэ, “Үрдэл” национальнай мусукаалынай бириэмийэ (СНКиХ бырайыага) ырыа күрэхтэрэ. “Үрдэлгэ” быйыл 6-с статуэткабын ыллым. “Үрдэл” 2015 сылга саҕаламмыта.
Үөрэҕим быыһыгар харчылаһарым
Устудьуоннуу сылдьан, аан бастаан ыллыырбар 2010 сыллаахха Семен Ченянов “Мозаика Арктик Войс” устуудьуйатыгар сылдьан саҕалаабытым. Онно араадьыйам хамнаһыттан тыыраммын, аттараммын бэйэм төлөһөрүм. Оччолорго хамнаһым барыта суот-учуот этэ: аспар-таҥаспар, оптуобуһунан айанныырбар барытын ааҕынарым. Төрөппүттэрбиттэн биир да солкуобайы көрдөөбөтүм. Оччолорго үөрэҕим төлөбүрэ балай эмэ суума этэ... Үөрэммитим иккис сылыгар “Хайаан да босхо үөрэххэ көһүөхтээхпин” диэн сыал-сорук туруорунан, туйгуннук үөрэнэммин, көһөрбүттэрэ. Араадьыйаҕа үлэм таһынан, эбии дохуот оҥостоору, төлөпүөн атыылыыр МТС хампаанньа солуонугар эмиэ үлэлиирим.
Бастакы ырыаларым “Көҥүл”, “Эт эрэ”, “Хотой” – ааптардара Валентин Макаров, Аркадий Николаев – Эрхаан, Николай Линди. Семён Ченянов “Маҥнайгы таптал” ырыаны айан биэрбитэ. Бу ырыалар мин куоласпар, уобараспар сөп түбэһэн айыллыбыт ырыалар буолаллар.
Пётр бастакы идэтэ “эколог природопользователь, иккис идэтэ – муусука учуутала, артыыс-вокалист (Дьокуускайдааҕы муусука колледжа, вокальнай салаа).
Бастакы “Көҥүл” ырыатын альбома 2013 сыллаахха тахсыбыта. Манна “Эт эрэ”, “Көҥүл”, “Сүбэлэр”, “Маҥнайгы тапталым” уо.д.а. ырыалар.
2023 сылга “Звезда” бүтүн Арассыыйатааҕы вокальнай куонкуруһугар Саха сирин аатыттан кыттыбыта. Кини онно “Аэропорты” Леонид Агутин уонна Владимир Пресняков ырыаларын толорбута.
Саҥарар: «Сахалыы Виктория”
Сахалыы Виктория айар кэлэктиибэ
2015 сыллаахха СНКиХ “Кастинг буолар” диэн ыҥырбыттарыгар, ону ааһаммын “Саҥа күн” биэриини ыытан барбытым. 7 сыл кэриҥэ үлэлээбитим. Бастаан “Саҥа күн” биэриигэ, онтон киэһээҥҥи, сайыҥҥы биэриилэргэ, маны тэҥэ “Тиэргэн” биэриилэри ыыппытым. Онно хаамыраны кытта үлэҕэ, тылга-өскө, сөпкө саҥарарга, толкуйга, дьону кытта алтыһарга тэлэбиидэнньэҕэ үлэлээбит кэмим улахан уопуту, үөрэҕи биэрбитэ. Онон эмиэ улахан махталлаахпын. Оччолорго салайааччы И.М. Андросов этэ, кэлин О.О. Марков буолбута. Биһиги салайааччыбыт Олег Колесов-Талбан этэ. Анна Кириллина, Алена Антонова, Георгий Белоусов, Михаил Сергеев бүгүҥҥэ диэри алтыһар доҕотторум, атастарым, эдьиийдэрим, убайдарым курдук сыһыаннаһар чугас дьонум буолаллар. Онтон хамсык кэмигэр тохтообутум, кинилэргэ мин “по совместительству” үлэлээбитим. Сүрүн үлэм – син биир “Сахалыы Виктория” этэ. Онон араадьыйаҕа үлэлээбитим (2009 сылтан) номнуо 17 сыл буола охсубут. Инньэ гынан үлэм киниискэтигэр биир эрэ суруктаахпын.
А.Д. Глотов -- “Виктория-Саха” радиостанция солбуллубат салайааччыбыт. Саха ырыатын-тойугун, саҥатын-иҥэтин киэҥ араҥаҕа таһааран үлэлэтэ олороллоро улахан хайҕаллаах уонна махталлаах дьыала.
Араадьыйабытыгар элбэх истээччилээхпит. Биһиэнэ сааратар-мусукаалынай биэрии буолан, истээччилэрбит араас араҥа. Ол быыһыгар – суоппардар уонна дьиэҕэ олорооччулар. Билигин сарсыарда 8 чаастан киэһэ 20 чааска диэри үлэлиибит. Урукку сылларга сууккаҕа 24 чаас тохтоло суох үлэлиир этэ. Билигин салалтаны кытта кэпсэтэммит, эдэр ыччаты тардар сыалтан сайыҥҥы кэмҥэ түүҥҥү эпиирдэри былаанныыбыт.
“Сахалыы Виктория” 104,5 FM долгуҥҥа 1997 сылтан 30 сылы кыайбат кэм устата ситиһиилээхтик үлэлиир, сахалыы тыллаах өрөспүүбүлүкэ олохтоохторун биир саамай сөбүлээн истэр араадьыйалара буолар.
“Завидный жених”
Ыал буола сылдьыбытым. Уруккуттан билсэр, экология идэтигэр бииргэ үөрэммит кыыспыныын бииргэ олорбуппут. Онтон бириэмэ ааһан истэҕин аайы хайдах эрэ тапсыбакка диэн буолбакка, сөп түбэспэккэ диэххэ сөбө дуу, арахсыбыппыт. Айар үлэлээх киһини тулуйар киһи тулуйар, өйдүүр киһи өйдүүр быһыылаах... Онон билигин сулумахпын, “Завидный жених” ыстаатыһыгар сылдьабын (күлэр). Чугастан алтыһар дьүөгэлэр бааллар эрээри, сөптөөх көстө илик. Ол эрэн саас ырааттар ыраатар, 35-м буолла. Бириэмэ көрдөрөн иһиэ, толкуйданабын...
“Иннэнэн кэйиэлээһин, көрүү-истии баар буолар”
Араадьыйаҕа үлэлии сылдьан, 2015 сылтан эстрада улахан “касталарын” ырыаһыттарын кытта билсиһэн барбытым. Ол иһигэр киирэргэ бириэмэтигэр син биир улахан тургутууну ааһаҕын. Айар эйгэлээх дьоҥҥо “иннэнэн кэйиэлээһин, хайдах эрэ көрүү-истии” син биир баар буолар. Кинилэр, хайа, “улахаттар” бөҕө буоллаҕа... Гостуруолларга сылдьан, чугастык алтыһаҕын. Маннык түгэҥҥэ тустаах киһи эдэриттэн-эмэниттэн тутулуга суох, бастатан туран, кини үтүө майгыта-сигилитэ улахан оруолу оонньуур дии саныыбын. Ону бэйэм аһаҕас, сэмэй, көнө майгылаах буоламмын буолуо, эдьиий-убай курдук саныыр аҕа саастаах ырыаһыт табаарыстарым кэккэлэригэр түргэнник чугаһаппыттара.
Билигин “кастабыт” эйгэтэ киэҥ. Айымньылаахтык үлэлии сылдьар чугас доҕотторум: Далаана, Олимпия, Лиза Газизова, Игорь Егоров, Байбал Сэмэнэп, Альберт Унаров, Кеша Лебедев-Амикан. Кинилэр үксүлэрэ Эстрада тыйаатырыгар суох артыыстар, хантан да хааччаҕа суох, бары көҥүлү сөбүлүүр дьоммут.
“Санаалар”
Эдьиийим кэриэтэ истиҥник саныыр Далаана миигин кытта чугастык билсэн баран, миэхэ анаан ырыа суруйар буолбута. Айымньы, ырыа айыллан, “төрөөн” тахсарыгар түүннэри-күнүстэри ырытабыт, кэпсэтэбит. Ырыаны айан таһаарыы, “оҕо төрүүрүн” кэриэтэ – бэйэтэ туһугар эмиэ чараас эйгэ. Далаана “Санаалар” диэн ырыаны 2022 сыллаахха айан биэрбитэ. Бэс ыйын 6 күнүгэр Опера уонна балет тыйаатырыгар буолаары турар сольнай кэнсиэрим ол аатынан “Санаалар” диэн ааттанна. Ол кэнниттэн “Дохсун” диэн ырыаны дуэттаан турабыт. Онтон “Сүрэҕим сулуһа” диэн таптал истиҥ иэйиитигэр анаммыт ырыаны, олоҕум уустук кэмигэр “Бу ырыа эйиэхэ көмөлөһүө” диэн айан, суруйан биэрбитэ.
Далаана ырыаны мээнэ айбат. Кини ырыаны бэйэтин ис туругунан сирдэтинэн, ырыаны айан биэрэр киһитин “Эн олоххор, билиҥҥи туруккар уҥа илиитин бу ырыа уунуо” диэн айан биэрэр. Онон ырыа курус, будулҕан санааҕа ыллара сылдьар кэмҥэр, үөрэ-көтө, дьоллоно, таптал сырдык иэйиитигэр куустара да сылдьар кэмҥэр эмтиир күүстээх, харыстыыр, араҥаччылыыр, күүс-көмө буолар дииллэрин итэҕэйэбин.
Онон ырыа сырдык иэйиитэ миигин оҕо эрдэхпиттэн арыаллыыр, “ийэм үүтүн кытары бииргэ кэлбит” диэн мэлдьи этэбин. Оҕо сырыттахпына, эһэм Пётр Никифорович Дмитриев-Туутук эбэм Анегина Ильинаны кытары кэллэхтэринэ, дьиэбит иһэ сырдыы түһэрэ. Пластинка бөҕөтө аҕалаллара. Оччолорго Гаврил Колесов суруйан, туойан хаалларбыт “Дьулуруйар Ньургун Боотур” виниловай быластыыҥканы дьонум холбоон кэбиһэллэр, ол муусукатыгар бигэнэн утуйарым. Бүтэһик матыыба түмүктэнэригэр уһукта биэрэн “салгыы холбооҥ” диэбиттии, ытаан марылыыр үһүбүн.
Ырыам миигин арыаллыыр, ырыа күүс эбэр
Олох эрдэ тылламмыппын. Кырабыттан олоҥхону истэ улааппытым. Биир сааспар хоһоон аахпыппын, иккибиттэн ыллыыр буолбуппун. 4-5 сааспар ааҕан барбыппын, Бастакы кылааска сүүскэ диэри ааҕар оҕо үөрэнэ киирбиппин. Тыл өттүгэр үчүгэйим, төрүт “гуманитарий” эбиппин.
Павловскай оскуолатыгар үөрэнэ сырыттахпытына, Егор, Светлана Неустроевтар “Тулуйхан” бөлөхтөрө оскуолабытыгар кэлэн, ырыаҕа дьарыктыы сылдьыбыттара. “Хотугу сулус” куонкурустарга ырыанан-тойугунан, үҥкүүнэн элбэхтик кыттыбыппыт. “Эрэлчээн” образцовай үҥкүү ансаамбылыгар өр кэмҥэ үҥкүүлээбитим. Учууталбыт В.Г. Плотникова оҕолору ускуустуба эйгэтигэр күүскэ сайыннарбыта. Улахан кылааска тахсан, ыллыы сырыттахпытына, 2004-2005 сылларга билиҥҥитэ “Сахаконцерт” салайааччыта Василий Кривошапкин Павловскайга кулууп дириэктэринэн ананан кэлэр. Онно ыллыырбын бэлиэтии көрөн уонна Лэгэнтэй ырыаларын ыллыырбын истэн, элбэх куонкурустарга сиэтэ сылдьан кытыннарбыта. Онон кыра эрдэхпиттэн ырыам миигин арыаллыыр, ырыа миэхэ күүс эбэр.
Сыана кэтэҕэр улааппыт оҕобун
Эбэтэ Анегина Ильиналыын
Оҕо эрдэхпиттэн эдьиийим Арассыыйа ускуустубатын үтүөлээх үлэһитэ, Саха тыйаатырыгар көстүүм худуоһунньугунан үлэлиир, “Чингис Хаан ыйааҕынан”, “Хара Мааска” киинэлэр сүрүннүүр көстүүм худуоһунньуктара Дария Дмитриева тыйаатырга оҕо эрдэхпиттэн сырытыннарара. Онтон Опера уонна балет тыйаатырыгар эбэм Анегина Ильина атаҕар сөрүөстэн сылдьыһарым. Онон тыйаатыр сыанатын кэтэҕэр улааппыт оҕобун. Ырыаһыттар, артыыстар сыанаҕа тахсалларыгар долгуйаллара өйбөр-санаабар хаалбыт. Ол да иһин буолуо, сыанаҕа ыллыы тахсарбар кыра долгуйуу син биир баар. Ол да буоллар эрдэҕэс сааспыттан көрө-истэ үөрэммит эйгэм буолан, көрөөччү иннигэр тахсарбын буолуохтааҕын курдук ылынабын. Билигин 30-тан тахса ылланар ырыалаахпын. Бэйэм ырыа айбаппын, ааптардар ырыаларын толоробун.
Улахан БЭЙИЭТтэр хоһоонноругар ырыалар айыллаллар
Бибилэтиэкэҕэ сылдьарбын наһаа сөбүлүүбүн. Ийэм өр кэмҥэ Нөөрүктээйи нэһилиэгэр бибилэтиэкэ сэбиэдиссэйинэн үлэлээбитэ. Куоракка Национальнай бибилэтиэкэҕэ мэлдьи сылдьабын, онно өйүм-санаам сааһыланар. Куорат сүпсүлгэннээх олоҕуттан бибилэтиэкэҕэ тиийдэхпинэ, бириэмэ тохтообукка дылы буолар. Бэйэм хоһооннору ааҕарбын олус сөбүлүүбүн. Архыыптары хасыһабын. Иван Арбита хоһоонноругар хас даҕаны ырыалаахпын “Эн ханна бааргыный?”, “Көмүһүөм”, норуот суруйааччыта Семён Данилов “Өрүү талас, тохтообокко” хоһоонугар ырыам былырыын айыллан тахсыбыта. “Тапталы өйүнэн айбаттар”, Бүөтүр Тобуруокап “Эн биһикки”, Суорун Омоллоон “Көмүһүөм” хоһоонноругар ырыалардаахпын. Чэ, сити курдук улахан бэйиэттэр хоһооннорун хасыһарбын сөбүлүүбүн. Кинилэр хоһооннорун аныгылыы тыыннаан, матыыптаан тилиннэриэххэ сөп дии саныыбын.
Ырыам матыыптарыгар Алексей Потаповтыын, Далааналыын, Егор Неустроев-Тулуйханныын, Эрхаанныын, Мэҥэ Уоланныын, о.д.а. кытта бииргэ үлэлэһэбин, кинилэр анаан-минээн мин ырыаларбар матыып айан биэрэллэр. Сотору кэминэн Байбал Сэмэнэптэн ырыа айыллан тахсыахтаах. Доҕорум Кеша Лебедев-Амикан эмиэ ырыа айда. Анна Барашкова репертуарыттан урукку ырыатын саҥалыы тыыннаан ыллыахтаахпын. Ити курдук айар эйгэбэр үлэ күөстүү оргуйар...
“Идти в ногу со временем”
Хойутуу, хамсык бириэмэтигэр кэтэхтэн, Филипп Киркоров, Аня Лорак, Кристина Орбакайте шоу-кэнсиэрдэрин туруорбут улахан биллиилээх режиссёрга... төлөбүрдээх “режиссёр” идэтигэр үөрэммитим. Буолаары турар кэнсиэрбэр онно ылбыт билиим, көрүүм аныгылыы тыыннаан барыта тиһиллиэхтээх. Ол курдук, Дьокуускайга урут тура илик улахан, үрдүк экирээннэр, бастыҥ уот-күөс, “пластичные, гибкие экраны”, ол эбэтэр уу курдук көстөрү туһаныахтаахпыт. Бэйэм көрөөччүлэрбин соһутар, кэрэхсэтэр “Вуа” көстүүлэри туһанар былааннаахпын. Онон дьоммор-сэргэбэр умнуллубат шоу-кэнсиэри бэлэхтээри бэлэмнэнэбин. Бэйэм уратытык “идти в ногу со временем” дэбииһинэн айарбын-тутарбын сөбүлүүбүн.
6 сыыппара кэчигирэспитэ мээнэҕэ буолбатах (06.06.2026)
Кэнсиэрим күнүн талбытым мээнэҕэ буолбатах. Алта сыыппара олоҕум устата миигин мэлдьи арыаллыыр “магическай” аптаах-алыптаах, дьоллоох сыыппарам буолар. Ол курдук, бастакы кэнсиэрим 6 сыыппаралааҕа, олорор кыбартыырабар, массыынам нүөмэригэр 6 сыыппара хоһулаһар.
Бэс ыйын 6 күнүгэр Опера уонна балет тыйаатырыгар буолар “САНААЛАР” Саҥа тыын, Саҥа иэйии, Саҥа санаа түстэнэр сыл бастыҥ ЫРЫА түһүлгэтигэр күндү көрөөччүлэрбин ыҥырабын!
Атах тэпсэн олорон Саргылаана БАГЫНАНОВА сэһэргэстэ.
