СӨ Култуураҕа министиэристибэтэ анал байыаннай дьайыы кыттыылаахтарын хорсун быһыыларын үйэтитэргэ анаммыт патриоттуу авторскай ырыа куонкуруһун биллэрдэ. Куонкуруһу Арассыыйа Дьоруойа Родимир Максимов көҕүлээбит.
Бастаабыт ырыаны Родимир Максимов “Норуот уонна аармыйа биирдэр” фашизмы утары өрөспүүбүлүкэтээҕи IV пуорумҥа бэйэтэ ыллыаҕа. Бастыҥ ырыаны суруйбут ааптар 300 тыһыынча солкуобайынан наҕараадаланыаҕа. Ону таһынан, анал аакка-суолга тиксибит ырыалары тэлэбиидэнньэҕэ, араадьыйаҕа, сыыппара платформаларыгар таһааран, киэҥник тарҕатыахтара.
Куонкуруска 18-тан аҕа саастаах, мэлдьи Саха сиригэр олорор дьон кытталлара көҥүллэнэр. Кыттыы төлөбүрэ суох. Дьүүллүүр сүбэ көрүүтүгэр нууччалыы эбэтэр сахалыы биир эбэтэр икки ырыаны киллэриэххэ сөп. Айымньы 2024 сыл тохсунньу 1 күнүттэн бэттэх айыллыбыт буолуохтаах.
Тэрээһин Арассыыйаҕа Норуоттар сомоҕолоһууларын уонна Саха сиригэр Култуура сылларын чэрчитинэн тэриллэр. Тэрийээччилэр – Култуура министиэристибэтэ, Норуот айымньытын өрөспүүбүлүкэтээҕи дьиэтэ, Ырыа айааччылар өрөспүүбүлүкэтээҕи сойуустара.
