От ыйын 5 күнүгэр Кэбээйигэ Олоҥхо ыһыаҕа түмүктэннэ. Үс күн устата ыһыах тэрээһинин чэрчитинэн 40-ча араас куонкурус, успуорт күрэҕэ буолла. Ыһыах үөрүүлээх сабыллыытыгар өрөспүүбүлүкэ таһымнаах куонкурустар уонна күрэстэр кыайыылаахтарын наҕараадалаатылар.
“Эр Бэрдэ” дэгит күрэскэ маннык бэртэр кыайдылар:
- 1 миэстэ уонна 250 тыһ. солк. бириэмийэ – Владимир Михайлов, Таатта улууһа;
- 2 миэстэ уонна 150 тыһс. солк. бириэмийэ – Владимир Федоров, Ньурба улууһа;
- 3 миэстэ уонна 100 тыһ. солк. бириэмийэ – Дьулустаан Ноговицын, Горнай улууһа.
2026 с. Олоҥхо ыһыаҕын бастыҥ хомусчута ааты Бүлүүттэн төрүттээх Эльза Данилова ылла. Кыайыылаахха үрүҥ көмүс хомуһу туттардылар.
Бастыҥ оһуокайдьыттар – Таатта улууһуттан Айта Васильева уонна Бүлүүттэн Семен Менкяров. Иккиэннэригэр – 30-туу тыһыынча солкуобайы биэрдилэр.
Олоҥхоһуттары саастарынан көрөн үс бөлөҕүнэн сыаналаатылар:
- Оҕолорго бастыҥ аатын Намтан төрүттээх Юрий Мордовской ылла – 100 тыһ. солк. сэртипэкээт;
- Ыччаттарга Бүлүү кыыһа Саина Шамаева бастаата – 300 тыһ. солк. сэртипэкээт;
- Улахан дьоҥҥо Гран-прини Мэҥэ Хаҥаластан Виталий Никифоров тутта – 700 тыһ. солк. сэртипэкээт.
Ыһыах сабыллыытыгар Олоҥхо ыһыаҕын ытык бэлиэтин – Ытык Дуоҕаны – Кэбээйи улууһун баһылыга Иван Левин Ленскэй улууһун дэлэгээссийэтигэр туттарда. Онон 2027 с. Олоҥхо ыһыаҕа аны Ленскэй улууһугар буолуоҕа.
