Эпос уонна ускуустуба Арктикатааҕы киинэ быйыл тутуллан үлэҕэ киириэхтээх. СӨ экэниэмикэҕэ министиэристибэтэ этэринэн, бу күннээҕи туругунан, тутуу 86%-на түмүктэммит. Элбэх функциялаах култуура ураты кластерын эмиэ Өлүөнэ күргэтин курдук “ВИС” хампаанньа тута сылдьар. Үбүлээһинигэр, бырайыагар уонна тутуутугар кини эппиэттиир.
Билигин тутууга 336 оробуочай, түөрт тиэхиньикэ үлэлии сылдьар. Инженернэй ситимэ тардыллар, сарайа, тас эркинэ, ис бараана, тиэргэнэ оҥоһуллар.
Эпос киинин уопсай иэнэ – 33 тыһ. кв. м, бүттүүн кээмэйэ – 252,6 тыһ. кууп. Сэттэ этээстээх буолуохтаах. Маныаха ханыылы эбийиэктэр билигин Кемероваҕа, Севастопольга, Калининградка уонна Владивостокка тутулла тураллар.
Киин генеральнай дириэктэрэ Андрей Саввич Борисов этэринэн, Эпос уонна ускуустуба киинэ Арассыыйа хотугулуу-илиҥҥи эҥээрин духуобунай-култуурунай форпоһа буолуохтаах.
