Хомус аан дойдутааҕы киинин уонна түмэлин дириэктэрэ Дмитрий Бястинов хомусчуттары, уһуйааччылары уонна пропагандистары кытары көрүстэ. Саҥа салайааччы Хомус сайдыытын инники былааннарын туһунан билиһиннэрдэ.
Санаа атастаһар аһаҕас киэһэҕэ Дьокуускай куораттан эрэ буолбакка, Томпо, Алдан, Бүлүү курдук ыраах улуустартан хомуһу итэриэһиргээччилэр санааларын атастаһа кэлбиттэр. Тэрээһин саҕаланыытыгар Хомус аан дойдутааҕы киинин уонна түмэлин бэрэсидьиэнэ Иван Алексеев – Хомус Уйбаан түмэл урукку дириэктэрин, Николай Шишигины кэриэстээн, биир мүнүүтэ саҥата суох турууга дьону ыҥырда.
Ол кэнниттэн мустубут дьоҥҥо-сэргэҕэ саҥа дириэктэри билиһиннэрэн баран, киниэхэ таһаарыылаах үлэни баҕаран туран, алгыс тылын эттэ.
Салгыы Дмитрий Бястинов Түмэл уонна Киин инники үлэтин хабаанын кытта билиһиннэрдэ. Кини: «Төрүт үгэһи тутуһуу - үлэ сүрүн хайысхата», - диэн бэлиэтээн эттэ. Ол эрээри саҥа сүүрээннэри кыахпыт баарынан өйүөхпүт диэн эбэн биэрдэ.
Саҥа дуоһунастарга анаммыт Туяра Жиркова уонна Эркин Алексеев бэйэлэрин үлэлэрин былаанын кытта билиһиннэрдилэр.
Мустубут ыалдьыттар саҥа дириэктэри эҕэрдэлээтилэр, тус санааларын эттилэр, интэриэһиргиир ыйытыыларын биэрдилэр.