Сэтинньи ый 25 күнүгэр, «Пульс» оҕо үҥкүүтүн ансаамбыла биэс сылын бэлиэтиир үбүлүөйдээх кэнсиэригэр бар дьоммутун күүтэбит!
Марха оройуонун биир тутаах оҕо үҥкүүтүн ансаамбыла «Пульс» култуурнай чэбдигирдэр киин иһинэн үлэлиир. Манна 70 тахса оҕо дьарыктанар. Биэс сыл иһигэр Марха орто оскуолатын 1, 3, 4, 7 кылааһын үөрэнээччилэрэ элбэх норуот үҥкүүтүн, араас хайысхалары баһылаан, ансаамбыл үүнэ-сайда турар. Өрөспүүбүлүкэтээҕи таһымнаах үҥкүү күрэхтэригэр кыттан үгүстүк ситиһиилэнэллэр, дипломант, лауреат аатын мэлдьи ылаллар.
Куорат олохтоохторун уонна ыалдьыттарын ансаамбыл биэс сыллаах үлэтин түмүгүн кэлэн көрөргүтүгэр ыҥырабыт!
Салайааччы – Саха сирин култууратын туйгуна Екатерина Афанасьевна Гомбоева.
Буолар сирэ: Заводская уул., 8, «Чэчир» култуура дьиэтэ.
Саҕаланар күнүс 14 чаастан.
Киирии билиэт сыаната: 150 солк.
