Бу туһунан СИА-ҕа СӨ култуура уонна духуобунай сайдыы миниистирэ Юрий Куприянов иһитиннэрдэ.

Юрий Куприянов тыйаатыр сылын уонна өрөспүүбүлүкэ иһинэн ыытыллар бырайыактары үбүлээһин боппуруостарын, Арассыыйа култуура миниистирин солбуйааччытын Павел Степановы уонна Ольга Ярилованы кытта дьүүллэстэ.

Павел Степанов Саха сирэ “Куньцюй” Пекиннээҕи тыйаатыры кытта бииргэ үлэлээһинин бэлиэтээтэ. СӨ бүтүн Арассыыйатааҕы тыйаатыр марафонугар кыттыаҕа. Ол курдук, Олоҥхо тыйаатыра Санкт-Петербург куоракка Тыйаатыр Олимпиадатыгар ыҥырылынна. Сергей Потапов «Мой друг – Гамлет» испэктээкилэ «Золотая маска» бириэмийэ түөрт номинациятыгар киирдэ. Ону таһынан, Саха сирэ «Желанный берег» диэн үбүлүөйдээх бэстибээли ыытыаҕа.

“Култуура” национальнай бырайыагы салайар Ольга Ярилованы кытта көрсүһүүгэ, Саха сирин сайаапкаларын дьүүллэстилэр. Бу барыта үлэҕэ киирэн, АФ үс сыллаах бүддьүөтүгэр бигэргэтиллибит барыллааһын үбүлээһинэ -- 523 мөл солк.

“Биһиги 116 мөл солк эбии үбүлээһин ылыахпыт. Бу былааннаммыт харчы буолар. Манан икки култуура дьиэтин тутан үлэҕэ киллэриэхпит. Олортон биирэ Горнай улууһун Дьикимдэ сэлиэнньэтигэр баар. Бу тутуу үлэтин хаамыытын бэрэбиэркэлиир былааннаахпын. Иккис дьиэ Уус-Алдан улууһун Сыырдаах сэлиэнньэтигэр тутуллар”, — диэн Юрий Куприянов СИА-ҕа иһитиннэрдэ.

Ону таһынан, Саха сирэ дойду бастакы аҕыс субъегар киирдэ. Манна 200-300 миэстэлээх киинэ заллардаах, аһыыр сирдээх, оҕо дьоҕурун сайыннарар оскуолалаах, библиотекалаах сайдыы Кииннэрэ тутуллуохтара. Тутуу 300 тыһ элбэҕэ суох нэһилиэнньэлээх куораттарга национальнай бырайыак иһинэн ыытыллыаҕа. Дойду үрдүнэн үс сыл иһигэр 39 киин тутуллара быланнанар. Миниистир этэринэн оҕо дьоҕурун сайыннарар оскуолаларга музыкальнай инструменнары ылыы федеральнай бүддьүөттэн үбүлэнэр.