РСФСР уонна Саха АССР искусствотын үтүөлээх деятелэ, ССРС Композитордарын сойууһун чилиэнэ, саха идэтийбит музыкальнай искусствотын төрүттээччи Марк Николаевич Жирков төрөөбүтэ 125 сылын, ааспыт 2017 сылга өрөспүүбүлүкэ култууратын киэҥ эйгэтэ, киниэхэ сыһыаннаах тэрээһиннэри элбэхтик ыытан, көхтөөхтүк бэлиэтээн ааспыта.
Марк Николаевич төрөөбүт Бүлүү улууһун дьаһалтата композитор үбүлүөйүн бэлиэтиир тэрээһиннэрин иһигэр, кини үөрэммит кыһатын кытары, Москуба П.И.Чайковскай аатынан консерваториялыын, киэҥ ситими олохтоон, улахан үлэни эмиэ ыыппыта. Ол курдук, 2017 сыллаахха муус устар 28 күнүгэр консерватория концертыыр кыра саалатыгар өрөспүүбүлүкэбит Опера уонна балет театра, филармония солистарын күүстэринэн, М.Жирков үбүлүөйүн бэлиэтээн, кини уонна билиҥҥи баар уонна олорон ааспыт саха композитордарын айымньыларынан улахан концеры ситиһиилээхтик ыыппыта. Бу концерт толорооччуларын истэригэр Бүлүү искусства оскуолатын үөрэнээччилэрэ В.Григорьев, А.Яковлева, Бүлүүттэн төрүттээх Вена куоракка үөрэнэ сылдьар Д.Слепцова уонна Гнесиннэр ааттарын сүгэр Москуба педагогическай институтун устудьуона Е.Михеева, Москуба консерваториятын устудьуона М.Ноговицын, Музыка үрдүкү оскуолатын үөрэнээччилэрэ А.Евдокимова, А.Тырина эмиэ ситиһиилээхтик кыттаннар, истээччилэр үрдүк биһирибэллэрин ылбыттара. Концерка кыттыбыт толорооччулары уонна кинилэр толорбут айымньылара үрдүк таһымнаахтарын истээччилэр (олор истэригэр Москубатааҕы консерватория педагогтара, Арассыыйа биллиилээх композитордара) эмиэ бэлиэтээн сыаналаабыттара.
Ол күннэргэ СӨ Култуураҕа уонна Духуобунаска министиэристибэтэ, Бүлүү улууһун дьаһалтата, Арассыыйа уонна СӨ Композитордарын сойуустара, Москуба П.Чайковскай аатынан консерваторията буоланнар, төгүрүк остуол тэриллиитин кэмигэр М.Н. Жирков айар уонна общественнай үлэтин бэлиэтээн, инники өттүгэр ордук чугас ситими олохтуур туһунан сөбүлэҥ түһэрсибиттэрэ.
Ол сөбүлэҥҥэ олоҕуран, Москубатааҕы консерватория уонна СӨ Музыка үрдүкү оскуолатын устудьуоннарын икки ардыларыгар күрэхтэһии ыытылларын туһунан быһаарыы ылыммыттара.
Онон, академическай вокалга үөрэнэр устудьуоннар истэригэр күрэхтэһии тэриллэн, бу сыл сэтинньи 23, 24 күннэригэр Москубатааҕы консерватория С.В. Рахманинов аатынан саалатыгар ыытылынна. Күрэхтэһии олохтоммутунан икки түһүмэхтээх буолан, бастаан, устудьуоннар үөрэнэр сирдэригэр бэйэлэрин икки ардыларыгар истиини бараннар, талылланнар, барыта 14 ырыаһыт кыттыыны ыллылар.
Дьокуускай устудьуоннарын бастакы түһүмэхтэрэ алтынньы 25 күнүгэр Музыка үрдүкү оскуолатын саалатыгар буолан ааспыта. Ол түмүгүнэн уон икки ырыаһыттан аҕыһа талыллан, Москубаҕа иккис түһүмэххэ кыттар чиэскэ тиксибиттэрэ. Олор истэригэр В.И. Колодезниковаҕа үөрэнэр А.Степанов, А.Иванов, А.Секова, Д.Никифоров-Келлер; А.М. Борисоваҕа үөрэнэр Р.Донская, С.Шараборина; Е.В. Яковлеваҕа үөрэнэр Ю.Караченцова, К.Жучкова бааллар.
Москуба консерваториятын өттүттэн бастакы түһүмэххэ уон икки устудьуон кыттан, алтата иккис түһүмэххэ талыллыбыт.
Күрэхтэһиигэ тосхолугар ыйыллыбытынан, толорооччулар программаларыгар үс айымньы иһигэр,биирдэстэрэ М.Н. Жирков эбэтэр саха атын композиторын айымньыта баар буолуохтааҕа ирдэниллибитэ. Уонна саха ырыата саха тылынан ылланыахтааҕын күрэхтэһии тэрийээччилэрэ икки өттүттэн сөбүлэһэн, хара бастакыттан тосхолго киллэрэн ылыммыттара биир бэлиэ түгэнинэн буолар.
Күрэхтэһии иккис түһүмэҕэр дьүүл салайааччытынан Арассыыйа норуодунай артыыһа, Москуба консерваториятын вокалга факультетын декана, профессор П.Скусниченко, дьүүл кыттыылаахтарынан Арассыыйа норуодунай артыыһа Ю.Григорьев, Москубатааҕы Улахан театр солистката Л.Рудакова, биһиги өттүбүтүттэн ССӨС уонна АСФСӨ норуодунай артыыһа А.Ильина-Дмитриева, Музыка үрдүкү оскуолатын вокалга кафедратын салайааччыта И.Чичкова буоллулар.
Ааспыт күрэхтэһии биир сүрүн түмүгэ диэн, саха академическай вокалга оскуолата үрдүк таһымҥа сылдьарын уонна Арассыыйа киин консерваториятын таһымыттан туох да хаалыыта суохтук сайдан иһэрин көрдөрдө. Дьүүл быһаарыытынан биһиги устудьуоммут А.Степанов бастаата, онно эбии Р.Донская, А.Иванов, Ю.Караченцева, С.Шараборина дипломант үрдүк аатын ыллылар.
Инникитин М.Н. Жирков аатынан күрэхтэһии тохтообокко иккилии сылынан тэриллэ турара күүтүллэр. Аныгыскыга, о.э. 2020 сылга, күрэхтэһии үөрэх бу икки кыһатын фортепианоҕа толорооччуларын икки ардыларыгар ыытыллыаҕа.
К.А. ГЕРАСИМОВ,
СӨ Композитордарын сойууһун салайааччыта,
СӨ искусствотын үтүөлээх деятелэ.
Хаартыскаҕа:
Москубатааҕы консерватория ректора А.С. Соколов.
