Бэҕэһээ Мииринэй политехническэй институтун уоланнарын “Мистер МПТИ-2018» күөн күрэhэ “Алмаас” култуура уораҕайыгар буолан ааста.
МПТИ устудьуоннарыттан 12 уолан күрэскэ кыттыыны ылла. Тэрийээччилэр, институт үлэhиттэрэ, устудьуоннар, тэрээhин урукку сыллартан ураты кэрэхсэбиллээх, сиэдэрэй буоларыгар кыhаннылар.
Күрэх бастакы түhүмэҕэ – ыччаттар күүстэрин-уохтарын тургутуу. МПТИ спордун саалатыгар уолаттар “челночнай сүүрүүгэ”, туора тимиртэн тардыныыга, муостаттан анньыныыга, бойобуой дьарыкка күрэхтэстилэр.
Онтон «Алмаас» култуура дыбарыаhыгар күрэс сүрүн чааhа буолла.
Бу – Самуил Маршак « Уон икки ый » диэн Саҥа дьыллааҕы остуоруйатын матыыбынан уус-уран дьүһүйүү-шоу. Дьыл уон икки ыйдарынан уон икки хорсун устудьуон буолла.
Онон күрэс испиктээх быыһыктаах буолан, көрөөччүлэр санааларын ордук тапта.
Бастакы түhүмэххэ устудьуон уолаттартан үҥкүүгэ, муодаҕа, Саҥа дьыллааҕы бастыҥ киэргэниигэ ким ордугун дьүүллүүр сүбэ көрдө.
Саха ньургун уолаттарыттан маннык хабааннаах тэрээhиннэргэ үгүс киhи кыттара – сэргэх көстүү.
Онон кыттааччылар сыанаҕа холкутук туттарга-хаптарга, дьон-сэргэ иннигэр саҥара-иҥэрэ үөрэнэллэригэр төһүү буолла.
Уолаттар хара маҥнайгыттан дьоһуннара, саалаҕа олорбут кэрэ аҥардар сүрэхтэрин сүүйбүт буолуохтаах.
Бүтэhик түһүмэххэ үҥкүү-битии, муода, артыыстааhын эрэ буолбакка, мындыр өй, уус-уран талаан, устуоруйаны билии тургутулунна.
Бары да күрэhи бэркэ диэн дьоһуннаахтык түмүктээтилэр.
Түмүккэ дьүүллүүр сүбэ мунньахтаан ким кыайыылаах буолбута билиннэ.
«Мистер МПТИ-2018» ааты Андрей Янков ылла.
Андрей ньиэп уонна гаас салаатыгар иккис кууруска үөрэнэр, Өлүөхүмэ куоратыттан сылдьар.
Бастакы “Вице-мистер МПТИ” – Андрей Андросов, иккис “Вице-мистер МПТИ” - Максим Ананьев буоллулар.
Бу кэрэ-бэлиэ тэрээhин успуонсордара да баай, бириистэрэ да бэртээхэй буолан биэрдэ.
Станислав Алексеев. Мииринэй куората.
