Олунньу 22-25 күннэригэр Хаҥалас улууһун Өктөм нэһилиэгин А.С Данилова аатынан “Барҕарыы” култуура киинигэр (дириэктэр Федора Фомина) сылын аайы ыытыллар “Сардаҥалаах Аартык” ырыа-үҥкүү күрэҕэ үрдүк таһымҥа ыытылынна. Бу күрэх аан бастаан 1994 сыллаахха Хаҥалас улууһун Өктөм нэһилиэгин иһинэн тэриллибитэ. Онтон 1997 сылтан республиканскай статуһу ылан, күн бүгүҥҥэ диэри ситиһиилээхтик үлэлиир.
Күрэҕи иилээн-саҕалаан тэрийбит дьонунан СӨ култууратын туйгуннара, култуура бэтэрээннэрэ Светлана Иванова, Лидия Федорова, Любовь Кондакова буолаллар. Ол кэнниттэн кинилэр үлэлэрин салҕаан, тэнитэн, билигин СӨ култууратын туйгуннара Федора Фомина, Любовь Кондакова, Зоя Аржакова айымньылаахтык үлэлии сылдьаллар.
Бу 24 сыл иһигэр сүрдээх элбэх талааннаах оҕолор өрөспүүбүлүкэ араас муннуктарыттан кэлэн кыттан, ыллаан-туойан, үҥкүүлээн ааспыттара. Манна кыттыбыт оҕолор, ыччаттар Саха сирин биллэр ырыаһыттарыгар тиийэ үүннүлэр, сорохторо тыа хаһаайыстыбатын араас салаатыгар ситиһиилээхтик үлэлии-хамсыы сылдьаллар. Сылын аайы “Сардаҥалаах Аартык” ырыа-үҥкүү күрэҕэр 400 -500 оҕо сөбүлээн кыттар.
2017 сыллаахха Гран – при үрдүк аатын Покровскай куораттан сылдьар “Эркээни эдэр сааһа” үҥкүү норуодунай ансаамбыла (салайааччы В.Е. Романова) ылбыта. Быйылгы күрэххэ Дьокуускай, Покровскай куораттан, Кангаласс, Мохсоҕоллоох бөһүөлэктэриттэн, Үөһээ Дьааҥы, Кэбээйи, Амма, Нам, Уус Алдан, Чурапчы, Мэҥэ Хаҥалас улуустарыттан барыта 370 оҕо кытынна. Бу күрэххэ аҥаардас Хаҥалас улууһуттан 11 нэһилиэк талааннаах оҕолоро кытыннылар.
“Лауреат Лауреатов” үрдүк аатын “Чугдаарар чуораанчыктар” вокальнай ансаамбыл ылла (салайааччы П.П. Егоров, Мэҥэ Хаҥалас улууһа, Табаҕа нэһилиэгэ). “Гран-при” хаһаайынынан Өктөмнөөҕү (ДьТХА) филиал 1-кы куурсун устудьуона Иоганн Матвеев буолла.
Тэрийээччилэр куонкурус спонсордарыгар Анна Даниловаҕа, Анна, Вячеслав Алексеевтарга, Борис Протодьяконовка, “Өктөм нэһилиэгэ” МТ баһылыгар Александр Большаковка тэрийээччилэр ааттарыттан барҕа махталларын тиэрдэллэр.
С.Багынанова
Алексей Игнатьев хаартыскаҕа түһэриитэ.
