Муус устар 18 күнүгэр СӨ Художественнай түмэлигэр “Иэйэхсит бэлэҕэ” диэн модельер-худуоһунньук, М.К.Аммосов аатынан ХИФУ Педагогика институтун доцена, Арассыыйа худуоһунньуктарын Сойууһун чилиэнэ, СӨ Култууратын үтүөлээх үлэһитэ Августина Филипова персональнай быыстапкатын үөрүүлээх аһыллыыта буолуоҕа. Быыстапка Киров уул. 9 баар түмэл иккис этээһин фойетыгар буолуоҕа.
Августина Филиппова дойдуга киэҥник биллэр таҥас дизайнера, кини оҥоһуктарын киһи тута билэр. Кини кэллиэксийэлэригэр саха оруотун баай култуурата, киһи уона айылҕа алтыһыылара уратытык бэриллэр. Саха таҥаһын аан дойдуга аар саарга аатырдыбыт маастар кырдьык да суон сураҕырар. “Удаҕан”, “Сарыада”, “Туосчаана”, “Хаарчаана”, “Эллэйаада” (1994) кэллиэксийэлэригэр биир таҥаска хас да интэриэһинэй ымпыктааһыннары түмпүтэ дизайн эстетикатын өттүнэн саҥа, ураты арыйыынан буолбуттара. Оттон "Мифы Якутии“ кэллиэксийэтэ таҥас-сап ураты кэрэтинэн, иис өттүнэн кыраҕы харҕаынан айыллыбытынан, ураты уобарастарынан дьону-сэргэни сөхтөрбүтэ. Кини үлэлэригэр дизайн идеята хас да арааһа түмүллэр, олус улахан илиинэн үлэ технологията туһаныллар: быысабайдааһын, оҕуруонан тиһии, лоскуйдарынан тиһии, түүлээҕи туһаныы. “Саха сирин алмаастара” (2003) кэллиэксийэтигэр Августина Филиппова хотугу норуоттар көстүүмнэрин уратыларын, кинилэр үгэстэрин киллэрбитэ.
Августина Филиппова этномуодата аныгы олоххо урукку уонна билиҥҥи кэми сибээстиир ураты күстээх.
Быыстапканы муус устар 19 күнүттэн ыам ыйын 26 күнүгэр диэри Национальнай художественнай түмэлгэ ким баҕалаах кэлэн көрүөн сөп. Сиһилии 33-52-79 төл. билсиҥ.
