Бүгүн, муус устар 18 күнүттэн “Үргэл” арт-галереяҕа Саха сирин араас муннугуттан 40-ча худуоһунньук уруһуйдаабыт 60 тахса мэтириэтин быыстапката саҕаланна. Үлэлэр араас ньыманан суруллубуттар. Ол курдук, бэчээт уонна графика, арыылаах уонна акрил кыраасканан.
“Үргэл” арт-галерея дириэктэрэ, Арассыыйа үтүөлээх худуоһунньуга Юрий Спиридонов маннык кэпсиир: “Мэтириэт – живопись биир саамай ыарахан жанра. Урут хаартыска суоҕар улахан суолталаах этэ. Ордук ыарахана диэн, бу киһи тас дьүһүнүн майгыннатыы буолбакка, кини ис туругун, санаатын тиэрдии буолар. Саха сирин бастакы идэтийбит худуоһунньугунан Иван Попов ааттанар. Кини харандааһынан уруһуйдаабыт мэтириэттэрин үгүс дьон билэр буолуохтаах. Санкт-Петербург куоракка художественнай үөрэххэ үөрэммитэ. Бу быыстапкаҕа кини удьуора Гавриил Петров кыттыыны ылар. Быыстапка ускуустуба сайдыытын, билиҥҥи үйэҕэ мэтириэти хайдах уруһуйдуулларын көрдөрөр сыаллаах”.
Быыстапкаҕа Гавриил Петров, Артур Васильев, Марианна Лукина, Людмила Слепцова, Эдуард Васильев, Федот Макаров, Наталья Николаева, Мира Аргунова уо.д.а. үлэлэрэ турда. Быыстапка муус устар 30 күнүгэр диэри үлэлиэҕэ.
