Санатар буоллахха, “Мин үрдүбэр күн хаһан да киирбэт” диэн Любовь Борисова киинэтэ Москубаҕа ыытыллар 41-с норуоттар икки ардыларынааҕы киинэ бэстибээлигэр икки наҕарааданы: “Дьон биһирэбилэ” уонна “NETPAC” (киинэ критиктэрин азиатскай ассоциациятын) биһиирин ылбыта.
Киинэ ааптардара 1,5 мөл солк харчынан наҕараадаланыахтара. Бу туһунан Ил Дархан Айсен Николаев Өрөспүүбүлүкэ күнүгэр уопсастыбаннас үөрүүлээх мунньаҕар иһитиннэрбитэ: “Саха киинэтин устааччылар Аан дойдуга төрөөбүт дойдуларын эрэ буолбакка, бүтүн Арассыыйаны ааттаталларынан киэн туттабыт. Владимир Солодовка айар бөлөҕү 1,5 мөл солк харчынан наҕараадалыыр туһунан сорудах биэрбитим”.
Айсен Сергеевич эрэгийиэн сүрүн соруга олохтоохтор туора туран хаалбакка баар кыаҕы туһаныылара диэн бэлиэтиир. Бу киинэ устааччыыларга эрэ буолбакка, бырамыысалынас бөдөҥ бырайыактарыгар, үөрэхтээһиҥҥэ, култуураҕа, успуортка сыһыаннах.
“Мин үрдүбэр күн хаһан да киирбэт” киинэ Москубаҕа ыытыллар норуоттар икки ардыларынааҕы киинэ бэстибээлигэр (ММКФ) кыттыбыт сахалар иккис киинэлэрэ буолар. Ааспыт сыллаахха Эдуард Новиков “Тойон кыыл” диэн киинэтэ Гран-при уонна киинэ кириитиктэрин наҕараадатын ылбыта. Ол саҕана Айсен Николаев куорат баһылыгынан үлэлии олорон айар бөлөҕү 3 мөл солк харчынан наҕараадалаабыта.
