Үөрэххэ-сырдыкка талаһар төлөннөөх уоту уматар Н.Г. Чернышескай аатынан Бүлүүтээҕи педколледжка хотугу улуустартан 56 оҕо учуутал уонна уһуйааччы идэтин баһылыыр ыра санаалаах үөрэнэр-сайдар.
Кинилэр ортолоругар бааллар ситиһии, кыайыы көтөллөөх үөрэх, спорт бастыҥнара, колледж киэн туттар устудьуоннара: Дьааҥыттан Сахая Другина, Виктория Путинцева, Кэбээйиттэн Сияна Кейметинова, Булуҥтан Федора Ачикасова, Анастасия Бетюнская, Анаабыртан Нюана Туприна, Дьааҥыттан Никамира Горохова, Усуйаанаттан Алексей Протодьяконов, онтон да атыттар. Оҕолор үгэс быһыытынан, бары уопсай дьиэнэн хааччыллаллар, стипендия таһынан, аска диэн көмө харчы көрүллэр.
Өрөспүүбүлүкэҕэ Арктика сыла биллэриллиэҕиттэн колледжка уһук хоту улуустартан сылдьар устудьуоннарга ураты болҕомто ууруллар. Устудьуоннар үөрэх таһынан араас түмсүүлэргэ сылдьаллар, айар дьоҕурдарын сайыннараллар. Аан дойду, өрөспүүбүлүкэ таһымнаах тэрээһиннэргэ кыттан, кыайыыга-хотууга үгүстүк тиксэллэр. Олор истэригэр элбэх көрөөччүнү түмэр күүтүүлээх “Хотугу кыыс” (Северянка) куонкурус ыытыллар. Быйылгы үһүс төгүлүн буолар куонкурус Өрөспүүбүлүкэ күнүгэр уонна Сомоҕолоһуу сылыгар ананна. Тэрийээччилэр куонкуруска кыттыыны кыыс оҕо иитиэхтээн илдьэ сылдьар ис кыаҕын арыйарыгар, бэйэтигэр эрэллээх буоларыгар өйөбүл, учуутал, уһуйааччы идэтин талан, үөрэххэ талаһыы, үтүөҕэ тардыһыы кыымын саҕар хардыы курдук сыаналыыбыт, билинэбит уонна биһириибит диэн этиилэрин мустубут ыччат чугастык ылынна.
Куонкуруска кылбаарар кытыллаах хотугу муораттан, киҥкиниир киэҥ куйаар туундара кыраайыттан, кырсалаах, саһыллаах, барҕа баай айылҕалаах хоту дойду 8 кыталык кыргыттара кытыннылар. Саала иһин толорбут көрөөччү үөрэх-билии кыһатыгар бииргэ үөрэнэ сылдьар күндү доҕотторун, эдэр саас эйгэтигэр эн-мин дэһэн тэҥҥэ алтыһар дьүөгэлэрин, кырылас кумахтаах Бүлүү биэрэгэр көрсүспүт биир үөлээннээхтэрин уруйдаан-айхаллаан, уҕараабат ытыс тыаһынан көрсөн-атааран, дьоро киэһэҕэ бары бииргэ буоллулар. Бу күн устудьуон уол ырыата-тойуга, устудьуон кыыс оонньуута-көрө дэлэйдэ. Кыргыттар күрэстэрэ кэрэни кэрэхсиир ыччакка Бүлүүтээҕи педколледжка үөрэммит кэмнэригэр өлбөөдүйбэт, күндү бэлэх курдук буолуоҕа.
\Куонкурус кыайыылааҕынан буолла Эбии үөрэхтээһин салаатыттан Елизавета Мальцева. “I Вице Северянка” титулга тигистэ Дьааҥыттан Никамира Горохова, “II Вице Северянка” Булуҥ улууһуттан төрүттэээх Мария Рожина буолла. Бар дьон биһирэбилин Муоматтан Айгылаана Федорова, Дьааҥыттан Альбина Потапова, Абыйтан Татьяна Захарова, Эдьигээнтэн Ираида Иванова, Милена Николаева ыллылар. Кыргыттар бары анал Мэҥэ ааттары, сыаналаах бириистэри тутан, үөрдүлэр-көттүлэр, күн курдук күлүмүрдээтилэр, сардаана курдук сандаардылар. Кыргыттарга махтанан туран, бу курдук сырдыы сылдьыҥ, кэрэни аттыгытыгар кэккэлэтиҥ, өрүү сыдьаай аргыстаныҥ диэн алгыс тыллары аныаҕы баҕарыллар.
Светлана МЫТНИК, Бүлүү куората.
