Ыам ыйын 15 күнэ – Саха сиригэр дьиэ кэргэн күнүнэн биллэриллибитэ. Бу дьаһалынан улуустарга, нэһилиэктэргэ араас тэрээһиннэр ыытыллаллар. Мэҥэ-Хаҥалас улууһун Матта бөһүөлэгэр "Айыыһыт алгыһа" диэн дириҥ ис хоһоонноох тэрээһин буолан ааста.
Саҥа киһи кэлиитэ бу дьиэ кэргэн уйгута, кэнэҕэски кэскилин түстэниитэ. Оҕолор туруктаах олохторуттан, нэһилиэк, улуус, өрөспүүбүлүкэ бүттүүн Саха норуотун инникитэ тиһиллэр. Ону өйдөөн, уопсастыбанньык Вероника Александрова, Култуура киинэ уонна Мөҥүрүөн нэһилиэгин олохтоох дьаһалтата, күн сирин саҥа көрбүт кырачааннары уонна кини төрөппүттэрин бэлиэтиир, арчылыыр тэрээһини ыыттылар. Бу күн кырачааннаар төрөппүттэринээн кэлэн ытык Эбээ алгыһын ылан, аал уот сыралыгар угуттанан аастылар. Кинилэр төрөппүттэригэр оҕо саадыгар түөрдүөн сыл сэбиэдиссэйинэн үлэлээбит "Ньургуһун" оҕо саадын сэбиэдиссэйэ Марианна Семёновна Ченянова уһуйааҥҥа ыҥырыы сурук туттарда, оҕону иитиигэ өр сыллаах үлэтиттэн мунньуллубут сүбэлэрин биэрдэ. Киһи доруобуйатын туруктаах буолуутун киинин үлэһиттэрэ Ньургуйаана Лонгинова уонна Айталина Скрябина оҕолорго ыытыллар прививкалар тустарынан сиһилии кэпсээтилэр. Онтон Олохтоох Дьаһалта исписэлииһэ Елена Семёновна Протопопова оҕолоох дьиэ кэргэҥҥэ судаарыстыба оҥорор көмөлөрүн, онно хайдах туох кыттыахха сөбүн быһаарда. Елена Семёновна иһитиннэриитигэр дьиэ кэргэттэр судаарыстыба өйүүр бырагырааммаларын туһанан дьиэ кэргэн туруктаах буолуутун хааччыйар үлэтэ нэһилиэккэ тэтимнээхтик ыытылларын бэлиэтээтэ. Ыҥырыылаах ыалдьыттар олус астынан, бэлэх тутан, сэргэхсийэн тарҕастылар.
Гоголева Вера Егоровна, икки оҕо ийэтэ:
– Айыыһыт алгыһа" тэрээһини наһаа сөбүлээтим, элбэҕи биллим. Инникитин маннык оҕо иитиитигэр аналлаах тэрээһин буола турдун."
Стрекаловская Вера, биэс оҕо ийэтэ:
– Бүгүн Мөҥүрүөн нэһилиэгэр Балаҕаҥҥа олус үчүгэй "Айыыһыт алгыһа" диэн тэрээһин буолла. Олус сэргээтибит! Куруук маннык тэрээһиннэри ыытар буолуҥ! Нэһилиэкпит тэрилтэлэрэ кэлэн араас элбэҕи, саҥаны биллибит. Махталбытын тиэрдэбит!
Кудинова Наталья, алта оҕо ийэтэ:
– Бүгүҥҥү "Айыыһыт алгыһа" диэн тэрээһин буолан ааста. Наһаа бэрт тэрээһин буолла. Астынныбыт аҕай. Өссө да инникитин маннык тэрээһин буола турдун диэн баҕа санаалаахпын.
Скрябина Айталина Афанасьевна, киһи доруобуйата туруктаах буолуутун киинин үлэһитэ:
– Бүгүҥҥү "Айыыһыт алгыһа" диэн тематическэй тэрээһини тэрийэн иилээн-саҕалаан ыыппыт Вероника Валерьевнаҕа, олохтоох култуура дьиэтин үлэһиттэригэр махтанабын. Олохтоох дьаһалта исписэлииһэ Лена Семёновна элбэх оҕолоох дьиэ кэргэҥҥэ материальнай көмөлөр тустарынан сиһилии кэпсээтэ. Уһуйаан салайааччыта Марианна Семёновна оҕону иитиигэ сүбэлэри биэрдэ. Балыыһа үлэһиттэрэ прививка туһунан кэпсээтибит.
Ньургуйаана Лонгинова, киһи доруобуйата туруктаах буолуутун киинин үлэһитэ:
– Бүгүҥҥү "Айыыһыт алгыһа" диэн тэрийии наһаа үчүгэйдик ааста. Элбэҕи биллибит, көрдүбүт. Тэрийэн ыыппыт Вероника Валерьевнаҕа, олохтоох култуура киинигэр барҕа махтал. Балыыһа прививкаҕа саҥа уларыйыы буолбутун билиһиннэрдибит.
