Бурятия народнай поэта Матвей Чойбонов көмөтүнэн Улан-Удэ куоракка “Восток” диэн кинигэ кыһатыгар саха суруйааччыта, Арассыыйа суруйааччыларын сойууһун чилиэнэ Евдокия Иринцеева-Огдо икки кинигэтэ күн сирин көрүө.
Евдокия Иринцеева-Огдо күннээҕи олоххо көстөр көрдөөх түгэннэри тэттик кэпсээн гынан суруйар маастар быһыытынан биллэр. Кини айымньылара судургу эрээрилэр ааҕааччыны толкуйдатар күүстээхтэр. Бүрээт тылыгар Надежда Гармаева тылбаастаабыт. Кини Евдокия Иринцеева айымньыларын былырыын “Байкал” журналга таһаарбыта.
Надежда Гармаева — поэт, Бурятия суруйааччыларын сойууһун бэрэссэдээтэлин солбуйааччы. Евдокия Иринцеева бүрээт доҕотторо кини айымньыларын нууччалыы тылынан эмиэ таһаараллар.
Бэс ыйын 18 күнүгэр Улан-Удэ куоракка Евдокия Иринцеева-Огдо кинигэтин сүрэхтэниитэ буолар.
