“Миллион алых роз” – дьон-сэргэ кутун туппут ырыа. Тылын Андрей Вознесенский суруйбута, Арассыыйа аатырбыт ырыаһыта Алла Пугачева толорор. Атын омук ырыаһыттара тылбаастаан, эмиэ сөбүлээн толороллор.
Ырыаҕа хоһуйуллар таптал кутаа уотугар куустарбыт худуоһунньук дьиҥ олороро сылдьыбыт киһи дуу эбэтэр өйтөн айыллыбыт дьоруой дуу? Дьиҥ олоро сылдьыбыт киһи, быстар дьадаҥы худуоһунньук суруллар. Кини аата – Нико Пиросмани. Нико Пиросмани омугунан грузин. Дьэ, Нико кими таптаан эрэйдэнээхтээбитий? ХХ үйэ саҕаланыытыгар Тифлисаҕа оонньуур артыыска Маргарита (омугунан француженка этэ дииллэр) кэрэ сэбэрэтэ, нарын быһыта-таһаата худуоһунньугу абылыан абылыыр. Ырыаҕа “Миллион, миллион алых роз... Из окна, из окна видишь ты” диэн суруллар. Дьадаҥы худуоһунньук тапталыгар чахчы мөлүйүөн аалай розаны бэлэхтээбит дуо?
Ол түгэн маннык. Сайыҥҥы нуурал сарсыарда Сололака кыараҕас уулуссаҕа баар мас дьиэ иккис этээһин түннүгэ тэлэччи аһыллан турар. Ити – Маргарита түннүгэ. Кыараҕас уулусса быыһынан тобус-толору сибэккилээх сүүнэ арба Маргарита дьиэтин айаҕар тохтуу биэрэр. Сибэккилэр саҥа быһыллыбыт буолан күн уотугар ордук тупсан, кылабачыһан көстөллөрө үһү. Үс-түөрт киһи мөлүөнүнэн сибэккини тротуарга, дьиэ боруогар тэлгииллэр. Манна Тифлиса эрэ сибэккитэ буолбакка, бүтүн Грузия сибэккитин барытын үргээн аҕалбыт курдуга диэн дьон-сэргэ кэлин олус сөҕөн-махтайан кэпсиирэ үһү. Худуоһунньук Нико Маргаритаҕа утары хааман кэлбитигэр хуу-хаа буола турбут дьон тута мах бэрдэрбиттэр, “аһыыр да харчыта суох худуоһунньук хантан бачча элбэх харчыны булта буолуой?” диэн толкуйга түспүттэр.
Оччолооҕу көрөн Маргарита Никоны саннытыттан кууспут уонна уоһуттан убураан ылбыт. “Мөлөйүөн розалаах” таптал түмүгэ хобдох буолар. Маргарита сотору кэминэн баай киһиэхэ эргэ тахсан, Тифлисаттан букатыннаахтык барар. Дьадаҥы худуоһунньук күннээххэ көрбүт соҕотох тапталын мэтириэтин уруһуйдуур уонна анныгар “и белым я прощаю тебя...” диэн суруйар.
Сэҥээриилэр