Сунтаар улууһун телевидениетын айар бөлөҕө олоҕу кытта тэҥҥэ хардыылаан, бэйэтин баҕа санаатынан саха дьонугар сонун реалити-шоу бырайыагы толкуйдаабыта быйыл үһүс сыла. Тэҥкэ нэһилиэгэр “7 күн. Абааһы балаҕана” диэн саҥа бэртээхэй биэриини уһуллулар.
Билигин киин телевидениеҕа социальнай ситимнэргэ араас туһалаах да, туһата да суох “реалити-шоу” диэн үөдүйэн, көрөөччү бэйэтин баҕатынан, талбытын сэргээн көрөр. Оттон биһиэхэ – саха дьонугар ыччаты чэбдик олох, сиэр-майгы үтүө өрүттэригэр көҕүлүүр соруктаах итинник бырайыактар бааллар дуо?
Сунтаардааҕы телевидение айар бөлөҕүн үһүс сылын үлэлэһэр бырайыага бэйэлэрин аналларын көрсө илик, араас тургутууга бэйэтин холонон көрүөн баҕалаах сулумах ыччаты түмэр.
Айар бөлөх аан маҥнай “Сэттэ күн”, былырыын “Ферма2 – дьол тааһа” диэн бырайыактары көрөөччүлэргэ бэлэхтээн улахан сэҥээриини ылбыта. Күннээҕи араас тургутууну, саҥа кэлэктиипкэ, араас түгэҥҥэ бэйэ быһыытын-майгытын көрүнүүнү о.д.а сэргэх түгэннэри кыттааччылар хайдах ааһалларын, түмүгэр ким кыайыылаах буоларын көрөөччүлэр долгуйа кэтэһэ-манаһа көрбүттэрэ. Бырайыагы өйөөн тэрийээччинэн уонна сүрүн бирииһи туруорааччынан “Саха” НКИХ буолар.
“7 күн. Абааһы балаҕана” үһүс реалити-шоу бырайыактарын айылҕаҕа тургутуу быһыытынан Тэҥкэ нэһилиэгэр ыыттылар. Айар бөлөҕү Ольга Захарова салайда. Араас улуустартан кэлбит 6 сулумах кыыс, 6 сулумах уол эрдэттэн бэлэмнэммит сорудахтары толордулар, айылҕа тургутуутун – өҥүрүк куйааһы, кумаар, оҥоойу хойуутун биллилэр. Кыттааччылар муҥхаҕа, сүүрүүгэ, өбүгэ оонньууларыгар о.д.а түһүмэхтэргэ кыахтарын, тулуурдарын холоннулар. Күрэхтэһиилэри кыахтаах бөҕөстөр Леонид Саввинов уонна Айаал Петров тэрийдилэр.
Сэттэ күн устата кыттааччылар да, тэрийээччилэр даҕаны бэйэ-бэйэлэрин кытта алтыһан, киһи бэйэтин ис кыаҕын, тулуурун, дьулуурун тургутан умнуллубат үтүө күннэри атаардылар. Бу курдук өссө биир бэртээхэй биэриини – бырайыагы бэлэмнииргэ төһүү күүс буолбут бары спонсордарга тэрийээччилэр, кыттааччылар улахан махталларын тириэрдэллэр. Оттон көрөөччүлэр бу бырайыагы “Саха” НКИХ ханаалыгар алтынньы ыйга тахсарын күүтэллэр.
Юлия АЛЕКСЕЕВА, ulus.media
