Балаҕан ыйын 3-4 күннэригэр, Ньурба улууһугар “Ньурба көмүс күһүнэ” диэн литература күннэригэр “Бичик” национальнай кинигэ кыһата көхтөөх кыттыыны ылла.
Бастакы күн, поэтесса, суруйааччы Клара Васильева 75 сааһын көрсө “Дьолум түһэ Ньурбабын Ийэм тэҥэ таптыыбын!” диэн литературнай бырааһынньыкка “Бичик” кинигэ кыһатын салайааччыта Август Егоров, сүрүн эрэдээктэр Валерий Луковцев, биллэр суруналыыс, Олоҥхо театрын литературнай салаатын сэбиэдиссэйэ Майя Власьева кыттыыны ыллылар.
Клара Васильева хоһооннорун ааҕыы, букроссинг, “Бичик” кинигэлэрин атыыта, кинигэ закладкатын оҥорууга маастар-кылаас ыытылынна.
Итиэннэ “Ырыаҕа ылламмыт, хоһооҥҥо хоһуллубут Куочайга дьолум түһэ – күөх Ньурба” хоһоону уус-уран ааҕыыга күрэх, “Күөх Ньурбам ахтыыта – Күн санаам кыната...” Клара Васильева ырыа буолбут хоһооннорунан кутаа тула истиҥ киэһэ буолан ааста.
Бэстибээлгэ Дьокуускай куораттан, хас да улуустан, 12 киһилээх “Айар кут” түмсүүттэн сырыттылар уонна Сунтаар улууһуттан “Суһум” литературнай түмсүү кыттыыны ылла. Тэрэһин иккис күнүгэр “Мин сырдык санньыарым...” диэн саха бастакы поэтессата Варвара Потапова сырдык кэриэһигэр бастакы аудио-кинигэтин сүрэхтэниитэ ыытылынна. Салгыы суруналыыс, суруйааччы С.П. Федотов төрөөбүт алааһыгар – Дьөттүҥҥэ А.С. Моякунов төрөөбүтэ 70 сылын бэлиэтээн ахтыы түгэнэ, Н.Т. Степанов аатынан Литература уонна фольклор түмэлигэр экскурсия, Ньурбачааҥҥа Иннокентий Дмитриев олорбут дьиэтигэр мемориальнай дуоска арыллыыта буолла. “Ньурба көмүс күһүнэ” литература бэстибээлэ Ньурба биир киэн туттар, талааннаах суруйааччыта Клара Дмитриевна Васильева төрөөбүт, үөскээбит Чаппандатыгар үрдүк таһымнаахтык түмүктэннилэр.
Наталья Протопопова, “Бичик” кинигэ кыһатын PR-менеджерэ
