“Сэргэлээх уоттара” култуура киинигэр “Саха сирин музыканнарын сойууһа” уопсастыбаннай түмсүү кэнсиэрэ буолан ааста. Манна устудьуоннар бастакы оркестрдарын билиһиннэрдилэр. Бу туһунан университет пресс-сулууспата иһитиннэрэр.
Түмсүү бэрэссэдээтэлэ Андрей Дедюкин иһитиннэрбитинэн, бэс ыйыгар Дьокуускайга норуоттар икки ардыларынааҕы бастакы “Розовая чайка” диэн эдэр толорооччулар куоҥкурустара ыытыллыбыт. Манна ХИФУ скрипачтарын квартета лауреат үрдүк аатын ылбыттар. Онтон кынаттанан ХИФУ уонна Дьокуускайдааҕы музыкальнай кэллиэс устудьуоннарын түмэн оркестр тэрийэргэ быһаарыммыттар.
Оркестрга инникитин күүстээх үлэ күүтэр. Алтынньы ый саҥата АХШ Чикаго куоратыттан виолончелист кэлэн кэнсиэр көрдөрүөхтээх. Ону таһынан, “Харысхал” киини уонна Дьокуускайдааҕы епархиены кытта ыкса үлэлииллэр. Хас нэдиэлэ аайы саҥа бырагырааммалары уонна кэнсиэрдэри көрдөрөр былааннаахтар. Оркестрга киириэн баҕалаах устудьуоннары “Сэргэлээх уоттара” култуура киинигэр күүтэллэр.
