Алтынньы 3 күнүгэр Үүнэр көлүөнэ тыйаатырын кэллэктиибэ суруналыыстары кытта көрүстэ. Тыйаатыр салайааччылара уонна артыыстар бу сылга үлэ-хамнас хайдах баран иһэрин, норуоттар икки ардыларынааҕы бэстибээллэргэ кыттыы уонна инники былааннар, гостуруоллар туһунан сырдаттылар.
Ол курдук, Тыйаатыр сылыгар норуоттар икки ардыларынааҕы таһымнаах кэккэ бэстибээллэргэ кыттыыны ылбыттар. Тыйаатыр уус-уран салайааччыта Алексей Павлов, нуучча тыйаатырын төрүттээчи Федор Волков аатынан үрдүк наҕарааданы ылбытын туһунан эрдэ суруйан турабыт.
Ону таһынан, Иркутскайга буолан ааспыт “Байкальский талисман” диэн оҕолорго уонна ыччакка аналлаах испэктээктэр бэстибээллэригэр ситиһиилээхтик кыттыбыттар. Манна “Кыһыл ойуун” испэктээги көрдөрбүттэр. Оттон Волковскай бэстибээлгэ “Беранже хоруол” испэктээгинэн көрөөччү биһирэбилин ылыан ылбыттар. Хабаровскайга ыытыллыбыт Уһук Илиҥҥи эрэгийиэннэр тыйаатырдарын бастакы бэстибээлигэр Ромео уонна Джульетта тапталларын устуоруйатыгар олоҕурбут “Таптал баарын тухары” диэн саҥа испэктээктэрин көрдөрбүттэр.
Билигин тыйаатыр уопсайа 48 үлэһиттээх, олортон 23 артыыс. Алексей Павлов нууччалыы тыллаах труппа баар буолуохтаах диэн санаатын эттэ: “Биһиги өрөспүүбүлүкэбитигэр араас омук дьоно олороллор. Онон, тыйаатырга нууччалыы тыллаах устуудьуйа баар буолуохтаах. Оччоҕуна тыйаатырга сылдьааччы да элбиэ этэ. Холобур, Нерюнгритааҕы тыйаатырга сахалыы уонна нууччалыы икки труппа баар”.
Инники былааннар туһунан этэр буоллахха, Уһук Илиҥҥи федеральнай уокурук түөрт куоратыгар гостуруоллуу бараары сылдьаллар. Манна хотугу норуоттар үһүйээннэринэн оҕолорго аналлаах “Дьол тааһа” уонна улахан дьоҥҥо “Беранже хоруол” испэктээктэри көрдөрүөхтэрэ.
Ол курдук, алтынньы 17-22 күннэригэр Хабаровскай куоракка, оттон Биробиджаҥҥа, Комсомольск-на-Амуре уонна Благовещенск куораттарга сылдьыахтара. Алексей Павлов этэринэн билиэттэр атыыга тахсыбыттар, сорох куораттарга номнуо бүппүттэр.
Суруналыыстар тыйаатыр дьиэтин өрөмүөнүн туһунан ыйыттылар. Тыйаатыр дириэктэрэ Матрена Павлова иһитиннэрбитинэн, көрөөччү саалата уонна артыыстар хосторо сабыллаары турар. 2020 сылга үбүлээһин көрүлүннэҕинэ тыйаатыр дьиэтин бөҕөргөтүү үлэтэ ыытыллыахтаах.
