Олунньу 13 күнүгэр, Ийэ тыл уонна сурук-бичик күнүгэр, Саха тылын быһаарыылаах улахан тылдьытын сүрэхтэниитэ буолан ааста. Суорун Омоллоон аатынан Опера уонна балет судаарыстыбаннай тыйаатырыгар бар дьон өр сыллаах үлэ түмүгүн үөрүүтүн, өрөгөйүн ытыс дохсун тыаһынан уруйдаата.
Тылдьыкка үлэлээбит лексикографтар Аммосова Ия Васильевна, Аммосова Людмила Неустроевна, Аммосова Ольга Никаноровна, Васильева Надежда Матвеевна, Васильева Надежда Николаевна, Сидорова Туяра Авсентьевна, Копырина Елена Петровна, Куличкина Матрёна Дмитриевна, Монастырёв Владимир Дмитриевич, Нелунов Анатолий Гаврильевич, Протодьяконова Ульяна Дмитриевна, Роббек Лия Витальевна, Слепцов Пётр Алексеевич, Попов Владимир Гаврильевич Дьокуускай к. мээрэ С.М. Авксентьева, Ил Дархан уонна СӨ Бырабыыталыстыбатын дьаһалтатын, СӨ Бырабыыталыстыбатын, Ил Түмэн махтал суруктарын, өйдөбүнньүк бэлэхтэрин туттулар.
Итини таһынан саха тылын салаатын сэбиэдиссэйэ, тыл билимин дуоктара Н.И. Данилова, тыл билимин хандьыдаата Н.М. Васильева СӨ Бырабыыталыстыбатын Бочуотунай грамотатынан, тыл билимин хандьыдаата Ф.Н. Дьячковскай Ил Түмэн Махтал суругунан, тыл билимин дуоктара Н.Н. Ефремов С.А. Новгородов аатынан бириэмийэнэн, лабараан М.Д. Куличкина Арассыыйа Билимин Академиятын Сибиирдээҕи салаатын Президиумун Бочуотунай грамотатынан, тыл билимин хандьыдаата Л.М. Готовцева СӨ Бырабыыталыстыбатын Махтал суругунан, тыл билимин дуоктара Е.И. Оконешников Ил Түмэн бэрэссэдээтэлин солбуйааччы А.Н. Жирков махтал суругунан наҕараадаланнылар.
Тылдьыт сүрэхтэниитэ ураты буолла. Казахстантан, Турцияттан билим эйгэтин үлэһиттэрин видео-эҕэрдэлэрин иһиттибит. Үйэ аҥаара кэриэтэ уһун унньуктаах үлэҕэ үгүс киһи үлэлээн ааспыта, бэйэтин кылаатын киллэрсибитэ. Олор кэккэлэриттэн, бастаан саҕаласпыт учуонайдар, учууталлар удьуордарыгар, аймахтарыгар тылдьыт толору кэмпилиэгин босхо ылары туоһулуур суруктары Гуманитарнай чинчийии институтун дириэктэрэ, тыл билимин хандьыдаата, доцент Н.И. Попова туттарда.
Тыйаатыр улахан экраныгар тахсар хаартыскаларынан доҕуһуоллатан, Н.И. Попова тылдьыт туһунан сиһилии кэпсээтэ. Тылдьыкка хара маҥнайгыттан үлэлээн кэлбит, картотека, учуонайдар үлэлэрин тэрийбит, түммүт академик П.А. Слепцов махтанан тыл эттэ.
Үйэ сүдү үлэтин сүрэхтэниитэ өссө да салҕанар. Ол курдук олунньу 14 к. Хаҥалас улууһун Чапаево сэлиэнньэтигэр (Өктөм нэһилиэгэ), М.Е. Николаев архыып-бибилэтиэкэтигэр Институттан дэлэгээссийэ тахса сырытта. Улуус баһылыгын солбуйааччы Николай Федоров кыттыылаах тэрээһиҥҥэ бу нэһилиэктэн төрүттээх, тылдьыты оҥорсубут, тыл билимин хандьыдаата Владимир Лиханов аата ааттанна.
Саха тылын быһаарыылаах улахан тылдьытын 15 туома хас биирдии саха ыалыгар күндү бэлэх буолан тарҕанна. Аныгы үйэ ирдэбилинэн СӨ Национальнай бибилэтиэкэтин Электроннай бибилэтиэкэтигэр pdf көрүҥүнэн оҥоһуллан киирдэ (https://e.nlrs.ru/collections/540).
Егор Николаев, тыл билимин хандьыдаата,
саха тылын салаатын үлэһитэ.
