Кулун тутар 11 күнүгэр Уус Алдан улууһун Бороҕонугар, Үүнэр көлүөнэ пуондатын генеральнай дириэктэрэ Сергей Местников уонна “РДР Групп” тутуу хампаанньатын дириэктэрин солбуйааччы Дмитрий Моисеев, В.В. Никифоров-Күлүмнүүр аатынан култуура дьиэтин тутар туһунан дуогабар түһэристилэр.
“РДР Групп” тутуу хампаанньата Дьокуускайга 203-с түөлбэҕэ олорор дьиэлэри тутар. Ону таһынан, 2017 сыллаахха 8481,2 кв м иэннээх “Арассыыйа – мин устуоруйам” историческай паарка эбийиэгин тутан үлэҕэ киллэрбитэ. Үүнэр көлүөнэ пуондата 26 сыл устата социальнай суолталаах бырайыактары олоххо киллэриинэн, социальнай эбийиэктэри тутуунан дьарыктанар. Саҥа эбийиэк тутуута бу сылтан саҕаланан Саха сирин норуоттарын VIII спортивнай оонньууларын (2022 сыл) көрсө түмүктэниэхтээх. Тутааччы бу сылга 40 мөл солк суумалаах үлэни ыытар былааннаах. Кыһыҥҥы суол сабыллыар диэри тутуу матырыйааллара аҕалыллыахтара.
