Кулун тутар 23-24-25 күннэригэр Былатыан Ойуунускай аатынан Саха Академическай тыйаатыра, Мииринэйгэ талыллыбыт айымньыларынан испэктээктэри көрдөрөрү былаанныыр.
Манна диэн эттэххэ, Саха тыйаатыра алмаастаах кыраай киинигэр бүтэһигин хаһан кэлэ сылдьыбыта да умнуллубут эбит. Биһиги диэки, саараама, кэлбэттэр этэ. Бу туһунан дьоҥҥо-сэргэҕэ хом санаа да баар эбит. Дьэ, онон аныгыскы нэдиэлэ саҥатыгар, Саха тыйаатыра Мииринэй куоратыгар, үс испэктээги көрөөччү дьүүлүгэр таһаарарын күүтэбит. Ол курдук “Хаарыан хампа күөх кытылым”, “Сааскы кэм”, “Ревизор”. Испэктээктэр Мииринэйдээҕи универсальнай киинэ-тыйаатыр киинигэр буолуохтара. Онно олохтоох профессиональнай тыйаатыр үлэлиир буолан, усулуобуйата, муусуката, дуораана (акустика), уота-күөһэ дьоһун. Онон мииринэйдэргэ бэртээхэй түгэн тосхойдо.
Станислав Алексеев, Мииринэй куората.
