Москубаҕа баар “Коломенское” түмэл-заповедникка саха сэргэтин туруордулар.
Коломенскайга сахалар мустан сыллата ыһыах ыһар үгэстээхтэр. Бу сырыыга уонтан тахса сыл тиһигин быспакка ыытыллар ыһыах кэмигэр туох баар сиэри-туому тутуһан сэргэни туруордулар. Ити туһунан Москубаҕа Саха сирин бастайааннай бэрэстэбиитэлистибэтин пресс-сулууспата иһитиннэрдэ.
Аан бастакы сэргэни дойдубут тэбэр сүрэҕэр 2007 сыллаахха, Саха сирэ Нуучча судаарыстыбатыгар холбоспута 375 сылыгар анаан туруорбуттара. Сэргэни Арассыыйа куораттарыгар, тас дойдуларга: Турцияҕа, АХШга, Мексикаҕа уо.д.а. дойдуларга туруорбуттара. “Кыым” хаһыат “Доҕордоһуу” сэргэтэ Кытайга Порт-Артур куоракка 2016 сыллаахха турбута.
Постпред Андрей Федотов иһитиннэрбитинэн, быйылгы сэргэни Москубаҕа олорор сахалар бэйэлэрэ чочуйан оҥорбуттар. Бу иннинэ турбут сэргэни Одинцовскай оройуонугар баар Никольская сэл. аттыгар турар “Бэс чагда” сонотуоруй тэлгэһитигэр көһөрүөхтэрэ.
Быйылгы Москубатааҕы ыһыах хамсыгынан сибээстээн онлайн ыытыллыбыт: нэдиэлэ устатыгар араас тэрээһиннэр барбыттар.
