Сергей Зверев – Кыыл Уорлун аатынан Норуот айымньытын киинин саҥа дьиэтэ бүгүн, балаҕан ыйын 22 күнүгэр үөрүүлээх быһыыга-майгыга арылынна.
Быйыл Кыыл Уолун төрөөбүтэ 120 сылын бэлиэтиибит. Онон бу саҥа аныгылыы киэҥ-куоҥ киин Сергей Афанасьевич үбүлүөйдээх сылыгар тутуллубута ордук суолталаах. Бу киин арыллыытыгар Ил Дархан Айсен Николаев сунтаардары илэ бэйэтинэн эҕэрдэлээтэ.
Саҥа киини Сунтаардар киэн туттар уоллара, “Арктик-Капитал” тэрилтэ генеральнай дириэктэрэ, Ил Түмэн дьокутаата Матвей Евсеев үбүлээн туттарбыт. Киниэхэ Айсен Николаев “Полярная звезда” уордьаны туттарда.
Саҥа киин 1 тыс. 600 кв. м. Иэннээх, 350 киһи биирдэ олорон көрөр кэнсиэрдиир саалалаах, норуот айымньытынан дьарыктанарга анал хостордоох. Киин сабыс саҥа миэбэлинэн, тэрилинэн толору хааччыллыбыт. Ураһалыы быһыылаах тупсаҕай тутуу саха култууратын, төрүт үгэстэрин сайыннарыыга улахан өҥөлөөх буолара саарбахтаммат.
