Ханнык баҕар нэһилиэк бэйэтэ туспа дьонун-сэргэтин бэйэтин тула түмэр эйгэлээҕэ хаһан баҕар үчүгэй уонна кэрэхсэбиллээх. Мэҥэ улууһун, Майа сэлиэнньэтин биир оннук киэн туттууларынан буолар - “Майа Долгуна” араадыйа ыстаансыйата.
“Майа Долгуна” араадьыйа уонтан тахса сыллааҕыта арыллан бэрт ситиһиилээхтик үлэлээн-хамнаан, айар аартыгын саҕалаабыта. Манна олохтоохтор бэйэ-бэйэлэрин эҕэррдэлэһэллэрэ, ырыа истэллэрэ, нэһилиэк, улуус иһинээҕи сонуннары истэн күннээҕи олохторун сэргэхситэллэрэ, аралдьыталлара. Хомойуох иһин, хас да сыл үлэлээн баран, кэккэ биричиинэнэн - сабылларга күһэллибитэ.
Бу күннэргэ, Мэҥэ улууһун олохтоохторо үөрүүлээх сонуну иһиттилэр. “Майа Долгуна” - араадьыйа үлэтин саҕалаата! Өр сыллаах тохтобул кэнниттэн, саҥалыы тыыннанан, араадьыйанан биэриитин сөргүттэ!
Аны мантан инньэ, араадьыйаны хаама сылдьан төлөппүнүнэн истэргэ, аныгы сайдыылаах үйэ хаамытынан массыына араадьыйатыгар бырахтаран «Bluetooth» көмөтүнэн истэргэ, эһиги “Play Маркет” мобильнай сыһыарыыттан – «Майа долгуна» араадьыйа сыһыарыытын хачайдаан ылан, буор-босхо истиэххитин сөп.
Бу дьоллоох түгэн, быйыл Мэҥэ-Хаҥалас улууһугар араадьыйа төрүттэммитэ 85 сылыгар түбэспитэ икки бүк үөрүүлээх.
“Араадьыйа - сайдыы биир сүрүн тосхоло. Интернет баар сиригэр, Аан дойду хайа баҕар муннугар сырыттарбыт, араадьыйа баарын тухары, ийэ тылбытынан төрөөбүт улууспут, дойдубут, дьоммут-сэргэбит тустарынан сонуннары истэр-билэр кыахтаммыппыт саныырга олус үчүгэй. Биһиги, маннык сылаас, сайаҕас, сахалыы эйгэни дьоммут куттарыгар үөскэтэргэ дьулуһуохтаахпыт. Олох тэтиминэн саҥа сүүрээннэри киллэрэн, араадьыйабыт үүнэ-сайда, кэрэхсэбиллээх биэриилэринэн толору буоларыгар, истэччитэ элбии уонна барыбытын үөрдэ турарыгар баҕарабын”!, - диэн истиҥ баҕа санаатын, эйэҕэс эҕэрдэтин тиэртэ “Майа сэлиэнньэтэ” МТ баһылыга Дмитрий Тихонов.
