Бүгүн, кулун тутар 16 күнүгэр, СӨ үтүөлээх артыыһа, Арассыыйа бочуоттаах кинематографиһа, Былатыан Ойуунускай аатынан судаарыстыбаннай бириэмийэ лауреата, Мэҥэ Хаҥалас бочуоттаах олохтооҕо, өр кэм устата “Сахафильм” киинэ хампаанньатын салайан олорбут Степан Николаевич Сивцев-Доллу күн сириттэн күрэннэ.
Степан Николаевич 1950 сыллаахха бэс ыйын 26 күнүгэр Мэҥэ Хаҥалас Доллутугар төрөөбүтэ. ССРС Аччыгый тыйаатырын иһинэн М.С. Щепкин аатынан Үрдүкү театральнай училищены (1974), Дьокуускайга марксизм-ленинизм университетын (1991), Уһук Илиннээҕи судаарыстыбаннай сулууспа академиятын (2002) бүтэртээбитэ. Маны таһынан, Санкт Петербурга кинофикация уонна киновидеопрокат исписэлиистэрин салайар куурустарга үөрэммитэ (2001).
Үлэтин Ньурбатааҕы көһө сылдьар тыйаатырга 1974 сыллаахха артыыс быһыытынан саҕалаабыта. 1976-1994 сс. – Саха тыйаатырын артыыһа. Степан Сивцев 60-тан тахса оруолу тыйаатыр сыанатыгар толорбута. 1994-1998 сс. – Саха циркэтин салайбыта, 1998-2015 сс. – “Сахафильм” тэрилтэ генеральнай дириэктэрэ. Кини элбэх уус-уран киинэлэри устубута.
Доллу "Кыымҥа" биэрбит тиһэх интервьютун бу сигэнэн киирэн ааҕыҥ http://kyym.ru/sonunnar/don/5270-dollookh-ki-i-dollu.
Степан Николаевич күн сириттэн күрэммитинэн кини урууларыгар, чугас дьонугар, доҕотторугар, кэллиэгэлэригэр дириҥ кутурҕаммытын тиэрдэбит.
