Кулун тутар 19 күнүгэр – Арктика күнэ бэлиэтэнэр. Бырааһынньык Саха сирин Аҕа Баһылыгын 2014 сыллааҕы, ахсынньы 11 күнүгэр тахсыбыт уурааҕынан бигэргиллибит. Сыала-соруга – Саха сиринээҕи арктическай улуустарын сайыннарыы уонна өйөбүл. 202 микрорайоҥҥа, Муус пааркатыгар - бырааһынньык номнуо сэттис төгүлүн ыытылынна.
Бырааһынньыктааҕы бырагыраамманы “Эннэкэн” норуот кэллэктиибэ - уус-уран салайааччылар Татьяна Баишева, Фаина Архипова, Хатыстыыр нэһилиэгэ, Алдан улууһа; «Сэттэ алмаас» - диэн ааттаах үҥкүү туруоруутунан арыйда
Кыттааччылары уонна ыҥырыылаах ыалдьыттары бочуоттаах салайааччылар уруйдуу-айхаллыы көрүстүлэр: Ил Түмэн Саха сиринээҕи судаарыстыбыннай мунньах бэрэссэдээтэлин солбуйааччы Виктор Губарев, Арктика уонна Саха сирин хотугу норуоттарын миниистирин солбуйааччы Михаил Погодаев, тас сибээскэ уонна Саха сирин норуоттарын дьыалаларын миниистирин солбуйааччы Татьяна Пяткина, Хотугу аҕыйах ахсааннаах норуоттар Ассоциацияларын бастакы вице-премьера Любовь Христофорова, Өксөкүүлээх аатынан норутттар доҕордоһууларын дьиэтин сүрүн дириэктэрин бырайыактыыр уонна уопсай боппуруостарыгар солбуйааччы Розалия Колосова.
Көрөөччүлэр хоту дойду аламаҕай дьонун кытары уһун, хараҥа кыһын бүппүтүн, күн тахсыытын, сандал саас кэлиитин үтүмэн үөрүүтүн бииргэ үллэһиннилэр. Истиҥ толоруулаах ырыалары иһиттилэр, хотугу үҥкүү абылаҥар ыллардылар, төрүт оонньууларга уонна күрэхтэһиилэргэ көхтөөх кыттыыны ыллылар.
Олус үчүгэй чочуллубут, уран үҥкүүлэри көрдөрдүлэр - “Нимнакан тэкэнин бинидут” II – ис Эрэгийэннэр икки ардыларынааҕы эбэҥки эпоһа бэстибээл кыттыылаахтара уонна I – кы өрөспүүбүлүкэтээҕи эбэҥки “Дэвэйдэ” эргиирдээх үҥкүүтүн кыттыылаахтара.
Күүрээннээхтик, өрө көтөҕүүлээхтик «Строганина Тала- 2021» тоҥ балыгы кыһыы күрэҕэ ааста. Дьүүллүүр сүбэ кыттааччылар сымса тутууларын уонна хайдах быһыылаах-таһаалаах балыгы кыһан таһааралларын болҕойон көрдө.
- - Кыайыылаахтарынан – Саха сирин эбэҥкилэрин Ассоциациялара таҕыста.
- - Иккис бочуоттаах миэстэни – Арктика уонна Саха сиригэр олорор норуоттарын министиэристибэтин бэрэстээбитэллэрэ ыллылар.
- - Үһүс –Эдьигээн улууһа.
Өксөкүүлээх аатынан норуоттар доҕордоһууларын дьиэтин пресс-киинэ
