«Туой-Хайа» өрөспүүбүлүкэтээҕи эстраднай ырыа бэстибээлэ – Саха сирин уус-уран эйгэтигэр биир чаҕылхай тэрээһин. Эстрада эдэр талааннарын күрэһэ быйыл 29-с төгүл ыытылынна.
Бу ырыа күрэҕигэр аҕыс сааһыттан уон алтатыгар, уон сэттэтиттэн отут биэһигэр диэри саастаах эдэр, чуор куоластаахтар кытыннылар. Ырыаһыттар ыраах Орто-Халыматтан, Булуҥтан, Анаабыртан, Үөһээ-Дьааҥыттан кытары кэлитэлээбиттэр.
Быйылгы бэстибээл талааннары тургутар кэнсиэр, кулун тутар 20 күнүгэр Арыылаах сэлиэнньэтин “Туой-Хайа” култуура дьиэтигэр буолла.
Ырыа куттаах ыччаттар, бэйэлэрин талааннарын туох баар кыахтарынан көрдөрдүлэр диир оруннаах. Ырыа ылбаҕайа ылланна. Үгүс чаҕылхай талаан быһаарылынна. Ырыаһыт ыччат кыаҕын толору көрдөрдө.Гала-кэнсиэр кулун тутар 21 күнүгэр Мииринэй куоратыгар, «Алмаас» култуура дыбарыаһыгар ыытылынна.Дьэ манна номинаннары уонна кыайыылаахтары чиэстээһин буолла.
Туох да диэ, Саха сиригэр ханнык да эстрада бэстибээлэ, биһиэхэ Мииринэйгэ курдук, баай бириистэри кыайыылаахтарга туттарбатах буолуохтаах.Урукку өттүгэр массыына, бирилийээн, нуорка саҕынньах, сыаналаах көмпүүтэр, харчынан балысхан бириэмийэ бэриллэрэ.
Бу да сырыыга «АЛРОСА» саҕалааһынынан ыытыллар тэрээһин, ырыа күрэһин кыайыылааҕар ботуччу бирииһи көрдө.Ол курдук, «Туой-Хайа-2021» эстрада бэстибээлин кыайыылааҕар - Мэҥэ-Хаҥалас Төҥүлүтүттэн төрүттээх Инна Донскаяҕа 200 тыһыынча солк. уу харчынан бириэмийэ тигистэ.Инна Донская аатырбыт биир дойдулааҕын – Аркадий Алексеев “Күһүҥҥү серенада” ырыатынан кыайда.
Станислав Алексеев, Мииринэй куорат. Ааптар фотолара.
