Art Doydu уонна Капелла Фильм киинэ хампаанньалара Арассыыйа уонна СНГ дойдуларыгар саҥа "ИЧЧИ" диэн кутталлаах киинэни киэҥ прокакка таһаарыахтара.
Кутталлаах киинэ быйыл ыам ыйын 27 күнүгэр киэҥ экраҥҥа тахсыаҕа. Бу мистическэй хоррор киинэни режиссер Костас Марсаан уонна продюсер Марианна Сиэгэн ("Мой убийца") устубуттар. Киинэҕэ айылҕа ураты кистэлэҥнэрдээх сиригэр олохсуйбут дьиэ кэргэн туһунан кэпсэнэр. Сүрүн оруоллары Борислав Степанов, Илья Яковлев уонна Марина Васильева толорбуттар. Марина Васильева "Нелюбовь", "Иваново счастье", "БиХэппи" уонна "Топи" киинэлэринэн биллэр. Былырыын күһүн "Иччи" киинэ Лиссабоҥҥа ыытыллыбыт хоррор киинэлэр норуоттар икки ардыларынааҕы бэстибээлигэр уонна Каталонияҕа ыытыллыбыт The Sitges киинэ бэстибээлин сүрүн бырагырааматыгар сүрэхтэммит. Билигин бэстибээллэргэ салгыы кыттар. TVCO диэн Италия хампаанньата саха кутталлаах киинэтин норуоттар икки ардыларынааҕы прокакка көрдөрөргө көҥүлү ылбыт, оттон High Octane Pictures диэн АХШ хампаанньата АХШга уонна Канадаҕа көрдөрөргө хантыраагы баттаспыт.
