Саха ынаҕын туһунан ырыа куонкуруһа: хоһоон түһүмэҕин түмүгэ

Куонкурус саханы иитэн-аһатан аҕалбыт төрүт сүөһүбүтүгэр махтанар, норуотугар дьоһун аатын төннөрөр, алаастарбытыгар-сыһыыларбытыгар хороҕор муостаахпытын төннөрөр соруктаах уонна “Кыым” хаһыат 100 сылын бэлиэтиир үлэ чэрчитинэн ыытылла турар. Хоһоон түһүмэҕэ сүрдээх өрө көтөҕүллүүлээх, элбэх айар дьон кыттыылаах ааста. Күрэххэ барыта 42 хоһоон киллэриллибитэ. Дьүүл сүбэтин быһаарыытынан, бастакы бастыҥнар барыл испииһэктэригэр 25 хоһоон талыллан киирбитэ.

Бүгүн Дьүүл сүбэтин быһаарыытынан, күрэх “Бастыҥ хоһоон” түһүмэҕин үс кыайыылаахтара билиннилэр.

I миэстэ – Римма Иннокентьевна Корякина-Хотууна (Чурапчы).

Сахабыт ынаҕа барахсан

Өбүгэ үгэһин утумнаан

Хороҕор муостааҕы иитэбит,

Төрүппүт сүөһүтүн маанылаан

Сахабыт ынаҕын туойабыт.

Хос ырыата:

Сайаҕас Мылахсын Айыылаах,

Сүтүөхчэ-сүппэтэх дьылҕалаах,

Төрүппүт ынаҕа барахсан,

Туругур үйэни уҥуордаан!

Алааска айаатыыр оҕустаах,

Хойуу үүт, эмис эт быйаҥнаах,

Саханы аһатан аҕалбыт

Сахабыт ынаҕа барахсан.

Саадьаҕай, эбирдээх ойуулаах,

Сытыары, сымнаҕас майгылаах,

Кыһыҥҥы тымныыга тулуурдаах

Сахабыт ынаҕа барахсан.

Маанылаах сахабыт ынаҕа

Бу тыйыс дойдуга эрэ баар,

Тэнийэ, барҕара, үксүү тур,

Сахабыт ынаҕа барахсан.

II миэстэ – Вячеслав Иванович Хон (Дьокуускай).

Алачайбыт, Маҥааспыт

Омук буолар аналга

Олук уурсан кэллэҕэ

Ааспыт быдан дьыллартан

Аар Айылҕа бэлэҕэ.

Хос ырыата:

Алачайбыт, Маҥааспыт

Ымыы баайбыт буоллаҕа:

Сылаас тыыннаах аргыспыт –

Саха омук ынаҕа!

Бээгэй дэппит бэйэтэ

Бэлэм сүөгэй үүт астаах.

Сатабыллаах иччитэ –

Саха – өлгөм хаһаастаах.

Алаас, сыһыы муҥунан

Аалыҥнаһа хаамтаргыт,

Сайдыы саҥа олугун

Туоһулара буолларгыт!

Өбүгэттэн алгыстаах –

Өлбөт-сүппэт аналлаах,

Былыргыттан дойдулаах –

Быралыйбат дьылҕалаах!

Көрүлүөҕэ күөрэгэй,

Көөчүктэниэ сай күөҕэр,

Күрүлүөҕэ үүт-сүөгэй,

Күүгэн алла сүүрүөҕэ!

III миэстэ – Ирина Колодезникова-Ымыы (Таатта).

Саха ынаҕа

Чочуйбут кэриэтэ

Чочуонай муостардаах,

Наҕыл да, үтүө да,

Наһаа кэрэ быһыылаах,

Налыйан-наскыйан,

Наллаан сылдьар майгылаах,

Сүрэҕи уоскутар

Сүрдээх дьикти үүт астаах.

Сахабыт ынаҕа –

Сахам сирин биир баайа.

“Тулабар мин дойдум,

Туйгун сирим!” диэбиттии

Тулуурдаах, дьулуурдаах,

Тупсан көстөр көстүүлээх,

Тоҥортон-хатартан

Толлубатах удьуордаах,

Төрөөбүт сиригэр

Төлөһүйэр төлкөлөөх.

Сахабыт ынаҕа –

Сахам бастыҥ биир баайа.

Былыргы өбүгэм

Быстарыктаах кэмигэр

Быйаҥнаах аскынан

Быыһаан ылбыт үтүөҕэр

Сүүһүнэн сылларга

Сүмэҕинэн аһаабыт

Айыы хаан аймаҕа

Айхал тылын аныыбыт.

Сахабыт ынаҕа –

Сахам дьоһун биир баайа.

Дьүүл сүбэтигэр үлэлээтилэр: түсчүт – А.Г. Гуринов-Арчылан, “Күрүлгэн” сурунаал уонна “Кыым” хаһыат “Кулуһун” уус-уран сыһыарыытын дьаһабыла; дьүүлдьүттэр: В.Н. Степанов – “Ситим” медиа бөлөх уонна “Төрүт баай” УоТ салайааччыта, В.Т. Лукин – “Саха сүөһүтэ” ХТ солбуйар салайааччыта; Г.И. Адамов-Сайдам – суруйааччы; Л.П. Григорьева – ХИФУ доцена, филология кандидата; М.Е. Иванов-Чуона Мэхээлэ – суруйааччы; С.С. Спиридонова-Кэрэмэс Кийиитэ – суруйааччы.

Кыайыылаахтары тэрийээччилэр уонна дьүүл сүбэтин аатыттан истиҥник эҕэрдэлиибит!

Кыым.ру сайтыгар ити чыыһылаҕа диэри хаалбыт хоһооннортон талан, чочуйан, тупсаран, үчүгэй ырыа айылларыгар өссө кыах биэрэргэ ырыа айыытын түһүмэҕин ыам ыйын 14 күнүгэр диэри уһатарга быһаарылынна.

Кытаатыҥ, ырыа күрэҕэр ситиһиилэри баҕарабыт.

Айар дьону көҕүлүүр инниттэн, саха ынаҕын туһунан ырыалаах дьон куонкуруһу таһынан көрдөрүүгэ (күрэххэ кыттыыта суох) ырыаларгытын ыытыаххытын сөп.

Ырыаҕа норуот биһирэбилин быһаарар куоластааһын икки сиргэ: “Кыым” саайтыгар уонна инстаграмыгар @kyym.ru тэҥҥэ ыам ыйын 14-17 күннэригэр ыытыллыаҕа. Куонкурус уопсай түмүгэ Ньукуолун күн тахсыаҕа.

Ырыалар видеоларын Этот адрес электронной почты защищён от спам-ботов. У вас должен быть включен JavaScript для просмотра., Этот адрес электронной почты защищён от спам-ботов. У вас должен быть включен JavaScript для просмотра. электроннай аадырыска, 8924-563-65-88 төлөпүөҥҥэ күүтэбит.

Билсэр төл: Кыым.ру саайт кэрэспэдьиэнэ 89148233173
Бассаап бөлөҕө: 8-914-274-15-69.

Тэрийээччилэр: “Саха сүөһүтэ” хааһына тэрилтэтэ,

“Төрүт баай” уопсастыбаннай тэрилтэ, “Кыым.ру” саайт.

Тарҕат: