Иннокентий Васильев – Лэгэнтэй үлэтиттэн уурайда. Кини, бы дьыл саҕаланыыта олунньуга, Өксөкүлээх Өлөксөй аатынан норуоттар доҕордоһууларын Дьиэтин дириэктэрин солбуйааччытынан анаммыта.
Ырыаһыкка, суруналыыстар кыайан эрийэн тиийбэтилэр. Өксөкүүлээх Өлөксөй аатынан Норуоттар доҕордоһууларын Дьиэтин дириэктэрэ Антонида Корякина, Иннокентий Васильев үлэтиттэн уурайыытын хайдах да быһаарар кыаҕым суох диэн эттэ: «Бу ыйытыы миэхэ буолбатах». Атын иһитиннэриилэр тиэрдэллэринэн, Лэгэнтэй уурайбытын туһунан бирикээс өссө от ыйын 22 күнүгэр тахсыбыт. Сорохтор этэллэринэн, дириэктэри салайааччы уоппускаҕа сылдьар.
Сыл аннараа өртүгэр, норуоттар доҕордоһууларын дьиэтигэр, салайааччы дуоһунаһын туһугар куонкурус биллэриллибитэ. Куонкуруска элбэх биллэр-көстөр култуура үлэһиттэрэ кыттыбыттара: быстах кэмҥэ дириэктэри солбуйааччы Розалия Колосова, Антонида Корякина, Гульжан Огонерова, ырыаһыт Иннокентий Васильев, Сардаана Брызгалова. Кыайыылааҕынан Антонида Корякина тахсыбыта. Розалия Колосова уонна Лэгэнтэй кини солбуйааччыларынан анаммыттара.
Иннокентий Васильев туһунан, Өксөкүлээх Өлөксөй аатынан норуоттар доҕордоһууларын Дьиэтин саайтыгар салгыы бу курдук суруллар: «Лэгэнтэй диэн сыанатааҕы аатынан биллэр саха эстрадатын биир сүрүн артыыһа буолар. Айар үлэтигэр элбэх ситиһиилэрдээх. Талааннаах ыччаты өйүүр Арассыыйа Федерациятын бэрэсидьиэнин гранын хаһаайына (2005с.). «Этигэн Хомус» музыкальнай бириэмийэ биэс төгүллээх кыайыылааҕа. Саха Өрөспүүбүлүкэтин мелодист-ааптардарын Сойуустарын чилиэнэ. Киэҥ далааһыннаах уопсастыбыннай үлэлэри иилээн-саҕалаан ыытар, «Ил Сүбэ» уопсастыбыннай тэрилтэ чилиэнэ ».
