Сайсары Эбэ "култуурунай нэһилиэстибэ эбийиэгэ буоларга булуллубут, кэрэхсэбиллээх сир" диэн ыстаатыстаммыт. Ити туһунан Саха сирин култуурунай нэһилиэстибэтин эбийиэктэрин харыстыыр департаменын пресс-сулууспата иһитиннэрэр.
Быһаарыыны өссө атырдьах ыйын 3 күнүгэр департамент уопсастыбаннай сэбиэтигэр көрөн ылыммыттар. Онуоха сайаапканы "Айыы Таҥара итэҕэлэ" уопсастыбаннай тэрилтэ (бэрэссэдээтэл Лена Валерьевна Федорова) түһэрбит.
"Сайсары Эбэ устуоруйа, этнология уонна социальнай култуура өттүнэн сүүнэ суолталаах. Бу күөл тула, номох кэпсииринэн, сахалар аан бастаанТуймаадаҕа кэлэн олохсуйбуттар. Бастакы сүөһүлээх-тойдоох сахалар бу күөл тула кэрэхсээн олохсуйан ууһаабыттар. Манна саха норуотун төрүттэрэ Оммоҕой Баай уонна Эллэй олохсуйбуттара", - диэн иһитиннэриигэ ыйыллар.
Сайсары күөл "Об объектах культурного наследия народов РФ" федеральнай сокуон чэрчитинэн судаарыстыбаннай харыстабылга киирдэ. Маныаха бу күөл тула ыытыллар тутуулар булгуччу сокуон ирдэбилинэн, хайаан да култуурунай нэһилиэстибэни харыстыырга туһуламмыт докумуоннаах, онуоха тутуу ыытылларыгар ол күөлгэ хайдах дьайарын көрөдөрөр эспэртиисэлээх буоларын ирдиир.
Сайсары Эбэ саха норуотугар дириҥ суолталааҕын, ытык сир буоларын бары бэркэ билэбит. Дьиҥэ, "Аар Айыы итэҕэлэ" уопсастыбаннай тэрилтэ департамент уопсастыбаннай сэбиэтигэр "Достопримечательное "Религиозное историческое место "Сакральное озеро "Сайсары" диэн буолуохтааҕар туруорсан сайаапка биэрбит эбит. Маннык киэҥ, дириҥ ыстаатыстанара сөп да буоллаҕа. Чэ, бастакы үктэл оҥоһулунна, кэнэҕэһин ытык сирбит суолтата сөптөөхтүк сыаналаныа диэн күлүкпүтгэр имнэнэбит.
