В.Никифоров-Күлүмнүүр аатынан Култуура Киинэ Уус Алдан Бороҕонугар бу сыл бүтүүтгэр номнуо арыллыаҕа. Бу туһунан култуура министиэристибэтин пресс-сулууспата иһитиннэрэр.
"Былаан быһыытынан саҥа киин 2022 сыл ортотугар үлэҕэ киириэхтээх диэн этэ, ол эрээри тутааччылар графигы быһа түһэн үлэлии сылдьаллар, билигин ис бараанын оҥороллор. Онон саҥа киин бу сыл бүтүүтэ үлэҕэ киириэҕэ", - диэн миниистир солбуйааччыта Владислав Левочкин кэпсээбит.
Саҥа култуура уораҕайыгар бибилэтиэкэ, оҕо ааҕар саалата, кинигэни харайар сир, 320 миэстэлээх аактабай саала, тэлгэһэтигэр фонтан баар буолуоҕа. Тутуу каркастан таҥыллыбыт, иэнэ 3 тыһ. кв.м. тахса.
Тутууну Ил Дархан дьаһалынан, Үүнэр көлүөнэ пуондатыттан үбүлээн ыыта сылдьаллар. Үбүлээһинэ 330 мөл. солк.
