Өксөкүүлээх Өлөксөй аатынан норуоттар доҕордоһууларын дьиэтин Айар мастарыскыай салайааччыта СӨ культуратын үтүөлээх үлэһитэ, биир дойдулаахпыт, Светлана Лукина авторскай бырайыагынан, туруоруутунан «Дьоллоох буолун бар дьонум» Горнай улууһун Бэс-Күөл олохтоохторугар анаан аһымал концерт бу дьыл алтынньы ый 8 күнүгэр тэриллэн ыытылынна.
Күн киһитэ көмүскэс, айыы киһитэ аһыныгас санааннан салайтаран Сахабыт сирин үтүө мааны, киэн тутта ааттыыр артыыстарбыт бу күн айылҕа кэрэ көстүүлэрин, төрөөбүт төрүт дойдуга, бар дьоммутугар дьолу-тапталы хоһуйар ылбаҕай ырыалары, кэрэ-нарын үнкүүлэри көрөөччүлэргэ бэлэхтээтилэр.
Көрүүччүлэр бииртэн биир кэрэ толоруулары ис дууһаларыттан артыыстар толорбут нүөмэрдэригэр дохсун ытыс тыаһын бэлэхтээтилэр.
Кэнсиэри иилээн-саҕалаан ыытта, биһиги биир дойдулаахпыт киэн тутта ааттыыр ыччаппыт Александр Максимов.
Үтүө санаа концерын тэрийбит Светлана Григорьевнаҕа, Өксөкүүлээх Өлөксөй аатынан Норуоттарын доҕордоһууларын дьиэтин салалтатыгар, дириҥ ис хоһоонноох нүөмэрдэри толорбут артыыстарга көрөөччүлэр ааттарыттан сылаас сыһыаннарыгар махталларын тиэртилэр.
Ойуурдаах куобах охтубат, дьонноох киһи тутайбат.
Светлана Лукина
