Киир

Киир

Бу бэстибээлгэ куонкуруһу таһынан «Холодное золото» диэн саҥа саха киинэтин эмиэ көрдөрүөхтэрэ. «Ыт» уонна «Нуучча» киинэлэр Arctic Open норуотар икки ардыларынааҕы киинэ бэстибээлигэр шорт-илиистэригэр киирдилэр уонна Архангельскайга буола турар Арктика дойдуларын V Норуоттар икки ардыларынааҕы Arctic Open бэстибээлигэр кыттыыны ылыахтара. Бу туһунан Ил Дархан уонна бырабыыталыстыба дьаһалтатын пресс-киинэ иһитиннэрэр.

 Киинэ бэстибээлин дириэктэрэ Тамара Статикова этэринэн, саха киинэтин Архангельскайга 2017 сыллаахтан көрдөллөр, оччолорго «Саха киинэтин нэдиэлэтэ» буолбут эбит. Кини бэлиэтииринэн, биһиги киинэбит ити куорат олохтоохторун өйдөрүгэр-санааларыгар уонна олоххо сыһыаннарыгар чугас.

«Ыраах, хоту дойду түҥкэтэх сирдэригэр, тыйыс айылҕаҕа олорор дьон судургута суох дьылҕаларын, күүстээх санааларын, боростуой майгыларын арыйар устуоруйалары көрөөччү ордук интириэһиргиир. Бу сылга киинэлэр ааптардарын ыалдьыттыы кэлэллэрин күүтэбит. Сардаана Левина, саха киинэтин тас дойдуларга билиһиннэрбит бастакы продюсер биһиги бэстибээлбитигэр дьүүллүүр сүбэ чилиэнэ буоларын туһунан этиибитин ылынна», - диэн Arctic Open дириэктэрэ кэпсиир.

Бу бэстибээлгэ дьүүллүүр сүбэ көрөрүгэр диэн 98 дойдуттан 1 562 үлэ киирбит. Олортон куонкурус бырагыраамматыгар 50 киинэ хапсыбыт: 8 толору кээмэйдээх уонна 12 кылгас кээмэйдээх хартыына, 22 документальнай үлэ, маны таһынан, кыра уонна обургу оҕолорго аналлаах 8 хартыына. Сүрүн кыттааччы дойдулар - Россия, Канада, Дания, Исландия, Финляндия, Норвегия, Швеция, АХШ.

ыт

Степан Бурнашев уонна Дмитрий Давыдов «Ыт» киинэлэрэ дэриэнэҕэ буолар үтүө уонна мөкү кэмэлдьилээх ыаллыылар сэттэ устуоруйаларын көрдөрөр. Кыра уол аҕатыттан ыйытыыта суох сааны ылар уонна доҕоругар уларсар. Дэриэбинэ тойоно биир эдэр уол дьиэтигэр кийиит кыыһы аҕалбытын, онтон аймахтары кытта билиһиннэрии түмүгэр кутталлаах, өйдөспөт буолуу түгэнэ үөдүйбүтүн туһунан билэр уонна субу манна кини эрэ көмөтүнэн уустук балаһыанньа бырааһыллар кыахтааҕа көстөр. Эдэр ыал аҕа баһылыга аймаҕын дьиэтин атыылыыр уонна алҕаска харчытын сүтэрэн кэбиһэр, мантан сылтаан кэргэнин кытта соччото суох сыһыан үөдүйэн барар... дьоруойдар салҕыы хайдах буолуохтарай?

«Нуучча» киинэни 2021 сыл биир улахан премьератынан ааттыыллар. Бу хартыына номнуо Карловые Вары норуоттар икки ардыларынааҕы киинэ бэстибээлин «Восток — Запад» куонкуруһун сиэссийэтигэр Гран-при буолбут. Режиссера Владимир Мункуев «Кинотавр» бэстибээлигэр бастыҥ режиссуратын иһин бириис ылбыт. 

нуучча

«Нуучча» психологическай дыраама поляк суруйааччыта уонна этнограф Вацлав Серошевскай айымньыларынан уһуллубут. Манна Саха сирин 19 үйэтэ көстөр. Хабдьый уонна кини кэргэнэ Кэрэмэс иккис оҕолорун уҥуоҕун көмөн баран тымныы уонна аччык кыһыҥҥа бэлэмнэнэллэр. Олохтоох кинээс эрэннэрбит көмөтүн оннугар кинилэргэ Костя диэн хаайыылаах нуучча киһитин дьукаах олордо ылалларыгар модьуйар. Биир уопсай тылы булуу хара маҥнайгыттан кыаллыбат, эбиитин хаайыылаах киһи дьиэ саҥа хаһаайына буоларга быһаарынар.

Тарҕат:

Санааҕын суруй