Киир

Киир

«Аан дойду хомуһа» челлендж Саха сириттэн сэтинньи 30 күнүттэн саҕаланна.

Саха аар-саарга аатырбыт эдэр хомусчута Айсен Аммосов көтөхпүт үтүө бачыымын Аан дойду 17 судаарыстыбата өйөөтүлэр. Кинилэр ортолоругар Арассыыйа, АХШ, Турция, Япония, Казахстан, Австралия бааллар.

Саха Өрөспүүбүлүкэтин Аҕа баһылыга Айсен Николаев бэлиэтииринэн: “Хомус – саха норуотун биир түҥ былыргы муусукаалынай үнүстүрүмүөнэ. Былыргы уонна аныгы хомус холбоспут чаҕылхай ситимэ – билигин Саха сирин визитнэй карточката буолла. Хомуһу өрө тутааччылар баар буоланнар,  биһиги ураты национальнай култуурабытын өрөспүүбүлүкэ тас өттүгэр кытары киэҥник билинэн эрэллэр”.

Эдэр кэскиллээх хомусчут Айсен Аммосов бигэргэтэринэн, кини саҕалааһынын итиччэ киэҥ араҥа дьон өйөөбүтэ – варганнай муусукаҕа болҕомто күүһүрбүтүн туоһулуур. “Куйаар ситимиттэн дьүрүһүйэр ыраас хомус дорҕоонноро киһи кутун-сүрүн, буор кутун эмтиир-ыраастыыр айыы аналлаахтар”, - диэн талааннаах эдэр киһи бэлиэтиир.

Челленжкэ кыттарга, социальнай ситимнэргэ бэйэҥ хомуска оонньуур видеороликкын угаҕын уонна #ХомусМира, #ЭйэХомуһа хэштегтэри туруораҕын. Аахсыйа кэнниттэн тэрийээччилэр бары кыттааччылар видеоларын холбоон, биир улахан ролик оҥорор баҕа санаалаахтар.

Санатар эбит буоллахха, Хомус күнэ 2011 сыллаахха бигэргэтиллибитэ. Бу күн саха норуотун былыргы ураты култууратын үөрэтэр-чинчийэр, салгыы сайыннарар сыаллаах-соруктаах. Быйыл кыһын, Хомус күнүн бэлиэтиир декада чэрчитинэн, араас куонкурустар, виртуоз-хомусчуттар маастар-кылаастара, кэнсиэртэр, "флешмуоптар" уонна быыстапкалар буолуохтара.

Бу иннинэ Иван Алексеев «Куйаартан кутуллар дорҕооннор» диэн кинигэтин онлайн-сүрэхтэниитэ буолбута.

Бүгүн сэтинньи 30 күнүгэр, Д.К. Сивцев-Суорун Омоллоон аатынан опера уонна балет судаарыстыбыннай Тыйаатырыгар бырааһынньыктааҕы тэрээһин буолара күүтүллэр.

Ахсынньы 5 күнүгэр  Хабаровскай куоракка Хомус күнэ ааһыаҕа.

Саха Өрөспүүбүлүкэтин Аҕа баһылыгын уонна бырабыытылыстыбатын пресс-сулууспата

 

 

Тарҕат:

Санааҕын суруй