Таатта улууһун Дьүлэй нэһилиэгэр, ахсынньы 2 күнүгэр, Георгий Никонов салайыытынан, «Пути великих свершений» документальнай киинэ устуута буолла. Изабелла Элякова салайыылаах иистэнньэңнэр түмсүүлэрэ «Ааллаах үүн таһаҕасчыттарын» таҥастарын кэтэн устуу тэриллиннэ. Манна нэһилиэк сылгыһыттара, уопсастыбаннаһа, салалтата көхтөөх кыттыыны ыллылар.
Үйэлээх бырайыак өссө да сайда, кэрэни кэрэхсэтэ, история кэрчиктэрин сырдата турдун.
«Пути великих свершений» документальнай киинэ Саха АССР төрүттэммитэ 100 сылыгар ананар уонна Арассыыйа судаарыстыбата Илин Сибиири, Уһук Илини, Соҕурулуу-илин Евразия кэнтиниэнин бүтэр уһугун, Алясканы уонна Хотугу Америка Арҕаа кытылларын баһылааһынын туһунан көрдөрөр.
Киинэни Арассыыйа биир улахан «Единая медиа группа» устуудьуйата устуоруйа хронологиятынан наардаан, 4 чааска арааран устар. Саха сиригэр нуучча омук XVII үйэҕэ сырыытын уонна сахалары кытта сибээһи олохтуурун туһунан чааһа «Россия» уонна «Моя планета» ханаалларга 2022 сыл олунньу ыйыгар көстүөҕэ.