Ахсынньы 10-11 күннэригэр, Сунтаар улууһугар "Алыптаах мааска" диэн өрөспүүбүлүкэтээҕи бэстибээл 6-с төгүлүн ыытылынна. Бу күрэскэ Үөһээ Бүлүүттэн, Амматтан, Сунтаартан, Мэҥэ Хаҥаластан, Хаҥаластан, Ньурбаттан норуот тыйаатырдара кыттыыны ыллылар.
Дьүүллүүр сүбэ: П.А. Ойуунускай аатынан Саха Академическай тыйаатырын үлэһитэ, Россия тыйаатырдарын союһун чилиэнэ Осипова Надежда Осиповна; СӨ үтүөлээх артыыһа, СӨ культуратын туйгуна, П.А.Ойуунускай аатынан Саха Академическай тыйаатырын артыыһа Апросимов Михаил Михайлович; СӨ үтүөлээх үлэһитэ, СӨ култууратын туйгуна, Олоҥхо тыйаатырын артыыһа, олоҥхоһут Исаков Валентин Гаврильевич; Өрөспүүбүлүкэтээҕи НАДь тыйаатырга сүрүннүүр үлэһитэ Захаров Алексей Константинович; Дьүүллүүр сүбэ бэрэсэдээтэлэ - СӨ култууратын үтүөлээх үлэһитэ, "Алыптаах мааска" өрөспүүбүлүкэтээҕи норуот тыйаатырдарын көрүү күрэс ааптара Очосов Юрий Дмитриевич.
Бастакы күн, "Партизан НАТК" дьиэҕэ, Хаҥалас улууһун Күөрдэмнээҕи норуот тыйаатыра "Сэрии тыйыс тыына" диэн испэктээҕинэн күрэһи саҕалаатылар.
Иккиһинэн Ньурба улууһун Дьаарханнааҕы "Хартасова-Терентьева Христина Ильинична аатынан куукула норуодунай тыйаатыра" Гаврил Дуяков "Кыыс Дьуурайа бухатыыр" олоҥхоттон 6 көстүүлээх, 4 хартыыналаах олоҥхо испэктээк көрдөрдүлэр. Дьаархаттар бу кыттыыларын СӨ култууратын туйгунугар, култуура байыаһыгар Юрий Емельянов сырдык кэриэһигэр анаатылар.
Киэһэ 4:30 чаастан Үөһээ Бүлүүлэр испэктээктэрин кэннэ тэрээһин үөрүүлээх аһыллыыта өрө таһымнаахтык ыытылынна. Сунтаар норуот тыйаатырын 60 үбүлүөйдээх сыла буолан артыыстар эҕэрдэ суругунан, махтал суругунан, мэдээлинэн наҕараадаланнылар. Улуус баһылыга Анатолий Васильевич Григорьев ис сүрэҕиттэн эҕэрдэ, махтал тылларын "Алыптаах мааска" бэстибээ кыттааччыларыгар уонна бэйэтин улууһун тыйаатырын артыыстарыгар эттэ.
Иккис күн Ньурба улууһун Антоновка нэһилиэгин "Айуу, чэ" норуот тыйаатыра "Ойуун түүлэ" диэн испэктээгинэн саҕалаатылар.
Барыта олус долгутуулаах. "Саамай түмүк кэтэһэртэн киһи долгуйар", - диэн куукула тыйаатырын артыыһа бэйэтин санаатын үллэстэр.
"Алыптаах мааска" өрөспүүбүлүкэтээҕи бэстибээлгэ куукула норуодунай тыйаатырын ситиһиилэрэ:
- "Лучшая работа художника по костюмам" диэн номинацияҕа Джулия Романовна Николаева тигистэ.
- "Лучшая работа оператора по звуку" номинацияны Елизавета Павловна Осипова ылла.
Күрэс түмүгүнэн кыайыылааҕынан Сэбиэскэй Сойуус Дьоруойа Федор Попов төрөөбүтэ 100 сылыгар анаммыт “Ытык иэс” диэн испэктээҕинэн (туруорааччы режиссер Данил Осипов) Майатааҕы Д.Ходулов аатынан норуот тыйаатыра кыайыылаах үрдүк аатын ылла. Манна даҕатан эттэххэ, эһиил норуот тыйаатырдара Майаҕа күөн көрсүһүөхтэрэ.
Оттон эмиэ биир үрдүк сыанабылы – көрөөччү биһирэбилин Абаҕатааҕы (Амма) норуот тыйаатырын “Саллаат дьылҕата” испэктээҕэ ылла.
Норуот тыйаатырдарын түмэр, кинилэр үлэлэрин дьоҥҥо-сэргэҕэ тириэрдэр, көрдөрөр сыаллаах көрүү күрэс үрдүк таһымҥа барда.
Куукула норуодунай тыйаатыра республикаҕа соҕотох тыйаатыр буолан өрүү дьон интэриэһин тардар.
Анна Григорьева
Ылыллыбыт сигэтэ: https://xn--90adptbcs3gya.xn--p1ai/article/34175
