Ахсынньы 10-12 күннэригэр Өксөкүлээх Өлөксөй аатынан норуоттар доҕордоһууларын дьиэтигэр «Туундара уонна тайҕа дуораана-2021» диэн Эрэгийиэннэр икки ардыларынааҕы IX хотугу аҕыйах ахсааннаах омуктар ырыаларын бэстибээл-куонкуруһа буолан ааспыт.
Тэрийээччилэр – Тас сибээскэ уонна СӨ норуоттарын дьыалаларын министиэристибэтэ өйөбүллээх Өксөкүлээх Өлөксөй аатынан норуоттар доҕордоһууларын дьиэтэ, СӨ хотугу аҕыйах ахсааннаах омуктар ассоциациялара.
Бэстибээлгэ, хамсыгынан сибээстээн, сорох кыттааччылар ZOOM куйаар платформатын нөҥүө нүөмэрдэрин көрдөрбүттэр, маны таһынан, эрдэ ыытыллыбыт видео-матырыйааллары көрбүттэр. Оттон кыттааччылар аҥаардара Өксөкүлэх Өлөксөй аатынан норуоттар доҕордоһууларын дьиэтин кыра саалатыгар ырыаларын ыллаабыттар.
Барыта холбоон Саха сирин 14 оройуонуттан уонна 4 атын эрэгийиэнтэн (Бурятияттан, Красноярскай кыраайтан, Амурскай уобаластан, Санкт-Петербург куораттан) 70 сайаапка киирбит.
Маны таһынан, бэстибээл чэрчитинэн, ырыаны толорууга маастар кылаас уонна дьүүллүүр сүбэ бэрэссэдээтэлиттэн В.П. Индигирскэйтэн, дьүүллүүр сүбэ бэрэссэдээтэлин солбуйааччытыттан Л.С. Ивановаттан брифинг ыытыллыбыт.
Түмүккэ, муҥутуур кыайыылааҕынан Красноярскай кыраайтан сылдьар Веретнова Галина Павловна ааттаммыт.
Сиһилии: http://ddnykt.ru/?p=33047 киирэн көрүҥ
