«Афиша» диэн медийно-сервиснэй платформа быһаарыытынан, Костас Марсаан «Иччи» диэн куһаҕан тыын туһунан ужас киинэтэ, 2021 сыл түмүгүнэн, бастыҥнар кэккэлэригэр киирбит.
Киинэ ис хоһоонугар биир оҕолоох ыал дьикти, таайыллыбат таабырыннаах, ураты сиргэ тиийиилэрин туһунан кэпсэнэр. Аны туран, бу кэлбит сирдэрэ-уоттара былыр-былыргаттан кырыыстаах дойду эбит, ол онтон куттанан олохтоох дьон мантан тэскилээбиттэр. Оттон бу аныгы кэмҥэ, ити сураҕы номох эрэ курдук ылынан, биир ыал олохсуйа кэлбит.
«Киинэ бастаан көннөрү дьиэ кэргэн олоҕун көрдөрөр. Оттон ортотуттан киһини салыннарар, стивен-кинговщина курдук хартыыналарынан куттаан саҕалыыр, оттон бүтэһигэр сюрреалистическэй, метафизическэй финалынан түмүктэнэр. Марсан маастар быһыытынан бэртээхэйдик дьайыыны уларытан иһэр (бастаан сүрүн дьоруой Лиза буолуох курдук этэ уонна салгыы фем-хоррор буолуохтаах курдук этэ, ол эрээри оннук буолбатах). Хас биирдии персонаж бэйэтин кошмарын, саамай улахан кутталын кытта көрсүһэригэр сөптөөх бириэмэ бэриллэр. Салгыы баран истэх аайы, дүҥүр охсуутунан үҥкүү киһини чахчы салыннарар, ордук чуолаан, бэлиэлээх финала киһини куттуур», - диэн «Афиша» эрэдээктэрдэрэ санааларын үллэстэллэр.
