Мукучутааҕы "Дэриэбинэчээн" норуот тыйаатыра 20 сыллаах үбүлүөйүнэн күндү көрөөччүлэрин түмэ тарта. Дьоро киэһэ үс түһүмэххэ араарыллан көрөөччүгэ бэрт интэриэһинэй буолла.
Ол курдук, артыыстар Платон Ламутскай "Сир иччитэ" тэттик испэктээгинэн саҕалаан, бар дьону тыйаатыр эйгэтигэр умсугута угуйдулар. Онтон иккис түһүмэххэ "Кырдал" литературнай түмсүү олохтоох ааптардарын суруйууларыгар, биһиги сүрэхпитигэр өрүү тыыннаах доҕотторбутун "Ахтан, санаан ааһыаҕыҥ..." хоһоонунан дьүһүйүүнү тыйаатыр артыыстарын кэрэ кыргыттара, Далбар Хотуттара итэҕэтиилээхтик ааҕан көрөөччү ытыһын тыаһынан доҕуһуолланнылар. Кэлэктиип үһүс түһүмэх айана сүүрбэ сыл анараа өттүгэр оонньоммут "Ыаллыылар" бэйэ тэттик туруоруута саҥа састаап артыыстар толорууларыгар салҕанна. Тыйаатыр көрдөөх артыыстарын абылыыр күүһүнэн ситимнэнэн астыммыт, дуоһуйбут көрөөччү элбээтэ, хаайтарыы, хамсык кэмин умуннаран көр-күлүү үксээтэ, быары быһар бэһиэлэй бэтиэхэ дэлэйдэ.
Дьикти-дьиибэ көрүдьүөстэр "Дэриэбинэчээн-чээн" "Бастыҥ артыыс-2021" анал ааттара - Вера Прокопьеваҕа, эр дьоҥҥо Софрон Гаврильевка ананан, артыыстар соһуччу үөрүү кынатыгар олорсон эппиэтинэс, ирдэбил өссө үрдээтэ.
Дьоро киэһэҕэ тыйаатыры төрүттэспит ытыктыыр, убаастыыр киһибитигэр, ССРС култууратын туйгуна, СӨ култууратын үтүөлээх үлэһитэ Люция Васильевна Кирилловаҕа, режиссердарга СӨ култууратын туйгуннара Анна Григорьевна Кычкинаҕа, Саргылана Егоровна Ивановаҕа эҕэрдэ суруктар, тохсунньу тоһуттар тымныытын аахсыбакка сибэкки дьөрбөлөрүн бэлэхтээтилэр. Чээн артыыстарга, ыалдьыттарга эҕэрдэ суруктар, грамоталар, махтал суруктар, ону тэҥэ "20 сыл дьол, үөрүү суолун тэлбиттэр" "Мукучу нэһилиэгэ" МТ баһылыга Анна Ивановна Сысоева үбүлээн, саҥа тахсыбыт иккис альбом-кинигэни бэлэх ууннулар.
Тыйаатыр абылыыр күүһүнэн ситимнэнэн көрөөччү ытыс тыаһын доҕуһуола, астына, дуоһуйа сынньаныыта хас биирдии артыыска дьол буоллаҕа. Тэрээһин туһунан суруйуубун Арыпыана кынаттаах тылларынан түмүктүүбүн:
Көрү-нары көхтөөхтүк
Бар дьонугар көҕүлүүр,
"Дэриэбинэчээммит" күндүгүн,
Күннэтэ, угуйа сайдаҕын!
Вера Прокопьева
